بسمِ اللہِ الرّحمٰنِ الرّحیم
آج چھبّیس نومبر بروز ہفتہ،
کویت میں یکم محرّم الحرام ہے
یا اللہ
تمام تعریفیں آپ ہی کے لیئے ہیں۔۔
ہم آپ سے دعا کرتے ہیں کہ
ہم سب کے لیئے یہ سال باعثِ خیر و برکت ہو
ہم سب کے لیئے یہ سال خوشیوں کا پیغام لائے،
ہم سبکی فکریں اور پریشانیاں دُور ہوں
ہم سبکی جائز حاجات اپنی بارگاہ میں قبول فرمائیے
ہم سبکو اپنے پسندیدہ بندوں میں ،
اپنے شکرگزار بندوں میں شامل فرمایئے
ہمیں قرآن سمجھنے اور اُس پر عمل کرنے کی توفیق عطا فرمایئے
ہم سے راضی ہوجایئے آمین
آمین یا ربَّ العٰلمین

---

سورۃ النساء
--
آیت نمبر 46 - 48

--
توبہ کی اہمیت
--
اِس درس کا آغاز ہورہا ہے آیت نمبر چھیالیس سے اور اِسکا مضمون پہلی آیات سے ملتا جلتا ہے
گذشتہ درس میں آپ سُن چکے کہ
ہم سے پہلے جن لوگوں کو کتاب دی گئی اللہ پاک اُنکےبارےمیں فرماتےہیں کہ
"وہ گمراہی کو خریدتےہیں اور یہ چاہتے ہیں کہ تمہیں بھی سیدھے راستے سے ہٹادیں"

اور اب آیت نمبر چھیالیس میں فرمایا:
"اور جو لوگ یہودی ہوگئے ہیں وہ کلام کو اُسکے موقعوں سے پھیردیتے ہیں۔۔۔"


ایک ہے "جو لوگ یہودی ہیں"
اور دوسرا ہے "جولوگ یہودی ہوگئے ہیں"
دونوں میں فرق ہے۔۔
جولوگ یہودی ہیں، ابتداء ہی سے ۔۔ نسلاً۔۔۔ ،
اسلیئے کہ یہودیت جو ہے یہ ایک نسلی مذہب ہے،
جو حضرت یعقوب علیہ السّلام
یا یہ کہہ لیں کہ حضرت اسرائیل علیہ السّلام کی نسل سے تعلق رکھنے والےہیں، وہ اپنے آپکو یہودی کہتے ہیں
اور کچھ لوگ وہ ہیں جو یہودی "ہوگئے"
یہاں اُن عربوں کی طرف اشارہ ہے جو نسل کےاعتبار سے یہودی نہیں تھےلیکن یہودیوں کی صحبت میں رہ کر،یہودیوں کے رنگ میں رنگ گئے اور اُنکے عظائم اور عقائد بھی یہودیوں جیسےہوگئے

تو اللہ فرماتے ہیں:
"اور جو لوگ یہودی ہوگئے ہیں وہ کلام کو اُسکے موقعوں سے پھیردیتے ہیں۔۔۔"


{تحریف کردیتےہیں، بائیبل کےماننےوالوں نے بائیبل میں لفظی تحریف بھی کی ہےاورمعنوی تحریف بھی کی ہےاور بائیبل میں تحریف کا ہونا ایک ایسی حقیقت ہے جسے صرف مسلمان محقّقین اور
علماء نے ثابت نہیں کیا،بلکہ خود عیسائی محقّقین نے بھی اِسے تسلیم کیا ہے۔

کہ بائیبل کے اندر، یعنی تورات اور اِنجیل میں تحریف ہوئی ہے،لفظی تحریف بھی اور معنوی تحریف بھی،
لفظی تحریف تو یہ کہ ایک لفظ کی جگہ دوسرا لفظ، ایک آیت کی جگہ دوسری آیت،اُسمیں شامل کردینا-
ایسی بات جو تورات اور انجیل میں تھی اُسکو نکال دینا۔
اور جو نہیں تھی اُسکو ڈال دینا۔
یہ تو لفظی تحریف ہوگئی۔۔
الحمدللہ ، اللہ کی آخری کتاب، قرآنِ کریم اس قسم کی تحریف سےمکمل طورپرمحفوظ ہے۔۔کوئی لفظ، کوئی آیت، کوئی سورت،کوئی جملہ تو کیا بدلا جاسکےگا،ہمارا یقین ہےکہ سوا چودہ سو سال کے عرصےمیں،اسکی کسی "حرکت" ، "شوشے" ، کسی "زبر" ، " زیر" ، "پیش" میں بھی کوئی تبدیلی نہیں کی جاسکی۔۔
اور تحریف کی دوسری قِسم ہے ، معنوی تحریف ،
کہ الفاظ کے معانی اپنی خواہشات اور اپنی مرضی کے
مطابق بیان کردینا۔}

تو اللہ فرماتے ہیں:
"اور جو لوگ یہودی ہوگئے ہیں وہ کلام کو اُسکے موقعوں سے پھیردیتے ہیں۔۔۔اور وہ کہتے ہیں ہم نے سُن لیا مگر مانا نہیں"

{نافرمانی کی۔۔ ظاہری مطلب تو یہ تھا کہ 'ہم آپکی سُنینگے اور غیر کی نافرمانی کرینگے'
۔ اور دِل میں مطلب یہ لیتے
'ہم نے کانوں سے تو سُن لیا،لیکن دِل سے تیری بات نہیں مانینگے'
یہ بھی تحریف کہ زبان سے تو کچھ اور کہتے اور دل میں اسکا مفہوم اور معنیٰ کچھ اور لیتے}

دوسری مثال : وہ کہتے۔۔ 'آپ سُنیں اور آپکو سُنوایا نہ جائے'
{ظاہری مطلب تو یہ کہ 'آپ ہماری بات سُنیں اور آپکو کوئی تکلیف دہ بات سُننی نہ پڑے'
لیکن دل میں مفہوم یہ لیتے۔۔ 'سُن اور {معاذاللہ} تُو بہرہ ہوجائے'

تجھے کچھ سننا نہ پڑے، تو کچھ سن نہ سکے یا اگر سنے تو شر کی بات سنے، اللہ کرے تجھے کوئی خیر کی بات سننے کو نہ ملے، دل میں یہ مطلب مُراد لیتے}

اب یہ کون بیان فرمارہا ہے؟ میرا اللہ۔۔ جو اُنکے دل کو جانتا تھا
ظاہری الفاظ تو بڑے پُرکشش تھے اور پُر تاثیر تھے اور پُر عشق تھے
لیکن انکے اندر نجاست بھری ہوئی تھی،انکے دلوں میں، اور دلوں کا حال جاننے والا۔۔۔ اللہ۔

تو عزیز قارئین صرف ظاہری شعر و شاعری سے اللہ خوش نہیں ہوتا،اللہ دل کو جانتا ہے، کہ دل میں کیا ہے؟ ہزار ہم کہتے رہیں، 'ہم حضور صلّی اللہ علیہ وسلّم پر قربان، ہم حضور صلّی اللہ علیہ وسلّم پر قربان' اور دل میں یہ بات نہیں ہے تو اللہ کے ہاں اس زبانی جمع خرچ کی کوئی قدر و قیمت نہیں

تیسری مثال۔۔ "راعِنا میں دین میں طعنہ زنی کی راہ سے زبانوں کو توڑتے موڑتے ہیں"
{عجیب انداز میں کہہ کر پکارتے۔۔اب ایک تو عربی کا لفظ ہے "راعِنا" ۔۔۔ اسکا معنیٰ تو یہ تھا
'ہمارا خیال کریں، بات سمجھ نہیں آئی دوبارہ سمجھادیں، ہماری رعایت کریں'
لیکن وہ اپنی زبان میں اسکو توڑ پھوڑ کر بولتےتھے۔۔ جسکا ایک معنیٰ تو بنتا تھا احمق اور بےوقوف اور دوسرے معنیٰ کے اعتبارسےبھی بڑی سخت گالی تھی انکی زبان میں، تو وہ گالی والا معنیٰ مراد لیتےاورحماقت والامعنیٰ مراد لیتے۔۔۔

۔۔۔ مسلمانوں کو پتہ نہیں تھا۔ مسلمان سیدھے سادے بھولے بھالے،اور مسلمانوں کی زبان عربی--تو مسلمان بھی انکا دیکھا دیکھی بعض اوقات یہی لفظ بولتے۔۔
حضورصلّی اللہ علیہ وسلّم سے کہتے "راعنا" ۔۔۔
حضور صلّی اللہ علیہ وسلّم ہمارا خیال کیجیئے، بات سمجھ نہیں آئی، بات دہرادیجیئے

مگر میرا اللہ تو جانتا تھا کہ 'یہ میرے حبیب صلّی اللہ علیہ وسلّم کی بےادبی کررہےہیں'
اور ظالم چاہتے ہیں کہ ہم گالی دیں اور سرِ عام دیں اور پتہ بھی نہ چلےکہ گالی دےرہےہیں
بلکہ نہ صرف خود گالی دیں بلکہ مسلمانوں کی زبان سےبھی گالی کہلوائیں}
اللہ اکبر----
کیا آج بھی ایسا نہیں ہے؟



یہ بد بخت۔۔۔
میرے اور آپکے آقا صلّی اللہ علیہ وسلّم کے دشمن۔۔
یہ چاہتے ہیں کہ حضور صلّی اللہ علیہ وسلّم کی شان میں گستاخی کریں
اور یہ چاہتے ہیں کہ مسلمان بھی گستاخی کریں،
کہتے ہیں 'ہم بار بار کارٹون بنائیںگے، بار بار گالیاں دینگے، تاکہ مسلمانوں کے اندر تحمّل پیدا ہوجائے' ان بد بختوں کے ہاں بے غیرتی کا نام ہے = تحمّل۔ رواداری ، برداشت۔۔
وہ اللہ جانتا تھا کہ یہ کس نیّت سے کہتے ہیں؟ تو اللہ پاک نے مسلمانوں کو منع کردیا
"تم آئندہ یہ لفظ نہیں بولنا"
ہم پڑھ چکے سورت البقرہ کی آیت نمبر ایک سو چار میں:
اللہ نے فرمایا
"اے ایمان والو تم{ وہ لفظ نہ بولو جس لفظ سے میرے حبیب صلّی اللہ علیہ وسلّم کی توہین کا پہلو نکلتا ہے} راعِنا نہ کہو۔۔ تم اسکے بجائے اُنظرنا کا لفظ بول لیا کرو"
معنیٰ دونوں کا ایک لیکن "راعنا" میں گالی کا احتمال تھا،بےادبی کا امکان تھا اور "اُنظرنا" میں یہ پہلو نہیں ہے،تو اللہ نے فرمایا کہ تم یہ لفظ بول لو۔

آیت کے اگلے حصے میں ارشاد ہے:
"اور اگر وہ کہتے، ہم نے سن لیا اور ہم نے قبول کرلیا ، اور سُنیئے۔۔{ راعنا کے بجائے} انظرنا کہتے - یہ انکے لیئے زیادہ بہتر تھا اور درست تر- لیکن اللہ نے ان پر لعنت کی انکے کفر کی وجہ سے۔۔۔۔۔۔"

{جس پر اللہ کی لعنت ہوجائے تو کیا ہوتا ہے؟ وہ اللہ کی رحمت سے محروم ہوجاتا ہے
لعنت کا معنیٰ یہ ہے کہ تم اللہ کی رحمت سے محروم ہوجاوَ،اسی لیئے ہمیں منع کیا گیا ہے کہ کسی پر لعنت نہ کرو۔ کسی متعیّن پر لعنت نہ کرو۔۔ یوں تو کہہ سکتے ہیں کہ چوروں پر، قاتلوں پر اللہ کی لعنت ہو، لیکن متعیّن طور پر کسی کی طرف اشارہ کرکے یہ نہ کہا جائے کہ تیرے اوپر اللہ کی لعنت ہو۔۔۔ چاہےدشمن ہی کیوں نہ ہو، کیوں کوئی اللہ کی رحمت سے محروم ہوجائے؟ اب بتایئے۔۔۔ کہاں تو یہ تعلیم ہے کہ دشمن کو بھی متعیّن کرکے یہ نہ کہو،کہ تمہارےاوپر اللہ کی لعنت۔۔ اور کہاں ہم؟ کہ اپنی اولاد تک کو کہہ دیتے ہیں کہ تمہارے اوپر اللہ کی لعنت ہو۔۔۔۔اپنے عزیزوں کو کہہ دیتے ہیں۔۔۔ذرہ ذرہ سے اختلاف پرکہہ دیتے ہیں۔}
بالخصوص جیسا کہ حدیث سے ثابت ہے،کہ عورتوں میں یہ عادت زیادہ ہے۔۔ اور ہمارے آقا صلّی اللہ علیہ وسلّم نے فرمایا کہ:
"عورتوں کے دوزخ میں جانےکی ایک وجہ یہ بھی ہوگی کہ یہ لعنت بہت کرتی ہیں"
{بد دعا بہت دیتی ہیں۔۔۔ تو ہم سبکو چاہیئے کہ اپنی زبان کے استعمال میں اور بد دعا دینے میں احتیاط سےکام لیں}
۔۔
اب آیت نمبر سینتالیس:
"اےوہ لوگو جنکو کتاب دی گئی ہے، ایمان لے آوَ اس کتاب پر،جو ہم نے نازل کی ہے،اور یہ کتاب تصدیق کرتی ہے اُن کتابوں کی،جو تمہارے پاس ہیں"

{قرآن پہلی کتابوں کی تصدیق کرتا ہے،اسمیں کوئی شک نہیں۔۔ یہ بات اللہ پاک نے قرآنِ کریم میں بار بار بیان کی۔۔۔ قرآن پہلی کتابوں پر مصدّق بھی ہے-- قرآن پہلی کتابوں پر مہیمن بھی ہے۔۔۔۔

مصدّق، یعنی پہلی کتابوں کی تصدیق کرتا ہے:
قرآن بتاتا ہے کہ تورات، اللہ کی کتاب ہے،
قرآن بتاتا ہے کہ انجیل، اللہ کی کتاب ہے،
قرآن بتاتا ہے کہ زبُور، اللہ کی کتاب ہے،
اور قرآن بتاتا ہے کہ حضرت ابراہیم علیہ السّلام ،
حضرت اسمعٰیل علیہ السّلام، حضرت موسیٰ علیہ السّلام،حضرت عیسیٰ علیہ السّلام،
حضرت یحییٰ علیہ السّلام ، حضرت یونس علیہ السّلام، حضرت داوَد علیہ السّلام ،
یہ سارے کےسارے ، اللہ کے نبی تھے ، اِن پر صحیفےنازل ہوئے۔۔ بلکہ ہمیں قرآن نہ بتاتا تو ہمیں پتہ ہی نہ چلتا۔۔ اور پہلی کتابوں میں جو بنیادی مضامین ہیں،قرآن انکی بھی تصدیق کرتا ہے،اور بنیادی مضامین تو تمام آسمانی کتابوں میں مشترک ہیں، بنیادی مضامین میں کوئی اختلاف نہیں،
توحید کا مضمون ساری کتابوں میں، نبوّت کا مضمون ساری کتابوں میں،
آخرت کا مضمون ساری کتابوں میں،اللہ کی عبادت کا مضمون ساری کتابوں میں،
نماز کا مضمون، زکوٰة کا مضمون ساری کتابوں میں،
مخلوقِ خدا کی بہتری کے بارے میں سوچنا،یہ مضمون ساری کتابوں میں،
اخلاقِ حسنہ کی تعریف،یہ مضمون ساری کتابوں میں،
اور بُرے اخلاق کی مذمّت،یہ مضمون ساری کتابوں میں ہے،
تو جو بنیادی مضامین ہیں ان میں ساری کتابیں متفق ہیں،
نماز، زکوٰة وغیرہ ایسے اعمال ہیں جو ہر شریعت میں تھے،
ہر نبی علیہ السّلام کی تعلیمات میں تھے۔۔۔تو قرآن پہلی کتابوں کی تصدیق کرتا ہے}

تو اللہ فرما رہے ہیں۔۔
کہ یہ کتاب کوئی الگ کتاب نہیں،تمہارے پاس جو کچھ ہے اسکےموافق ہے،اسکی تصدیق کرتی ہے۔۔
حیرت کی بات نہیں ہے؟ مسلمان یہ تسلیم کرتے ہیں کہ سینا پر حضرت موسیٰ علیہ السّلام کو تورات ملی،
اور انجیل پر مسلمان کا ایمان،
لیکن یہود و نصاریٰ تسلیم نہیں کرتے کہ فاران میں اور غارِ حرا میں محمد الرّسول اللہ صلّی اللہ علیہ وسلّم کو قرآن ملا،
وہ نہیں مانتے اور ہم مانتے ہیں،
عجیب بات ہے،
ہمیں کہتے ہیں تنگ دل، تنگ نظر، تنگ ظرف۔۔
بتایئے۔۔جوسارےنبیوں کو مانتے ہیں اور سبکی تعریف کرتے ہیں،
اور ساری کتابوں کی تصدیق کرتے ہیں، وہ تنگ نظر ہیں یا وہ ؟
جو اپنی کتاب کے علاوہ ہر کتاب کا انکار کرتے ہیں۔
اور اپنے نبی کے علاوہ سب نبیوں سے بُغض رکھتے ہیں۔ وہ تنگ نظر ہیں؟

الحمدللہ اللہ پاک نے ہمیں، وُسعتِ نظر سے نوازا ہے،اور یہ وُسعتِ نظر اور وُسعتِ قلب ہمیں قران سے مِلی ہے،
ہمیں محمد الرّسول اللہ صلّی اللہ علیہ وسلّم کے قدموں کی خاک سے ملی ہے،آپ صلّی اللہ علیہ وسلّم کی تعلیمات سے ملی ہیں،
اگر ہم قرآن کے ماننے والے نہ ہوتے اور حضور صلّی اللہ علیہ وسلّم کے ماننے والے نہ ہوتے ،
تو ہم بھی تنگ نظر ہوتے،تنگ دل ہوتے، دوسرے نبیوں پر کیچڑ اُچھالتے،
لیکن ہم ایسا نہیں کرتے،
ہمارے مُنہ سے تو کبھی کسی نبی کا نام نکل جائے اور ہم "علیہ السّلام" نہ کہیں تو ڈر جاتے ہیں۔
کہ نبی کا نام لِیا ، "علیہ السّلام " کیوں نہ کہا؟
اہتمام کرتے ہیں کہ جس نبی کا بھی نام لیں ، ہم ۔۔ "علیہ السّلام " ، "علیہ السّلام " ، "علیہ السّلام " ، کہیں ۔
لیکن دنیا کا کوئی دوسرا مذہب نہیں ہے , جو ہمارے پیارے نبی صلّی اللہ علیہ وسلّم کا نام اسطرح ادب و احترام سے لیتا ہو۔۔ {تحقیق کر کے دیکھ لیجیئے} کوئی مذہب ایسا نہیں ہے۔ بہت سے لوگ جو یورپ والوں کی وُسعتِ قلبی سے، فراخدلی سے، وُسعتِ نظر سے، رواداری سے، اور انکے تحمّل کی جھوٹی داستانوں سے بڑے متاَثر ہوتے ہیں، وہ کبھی انکو قریب سے دیکھیں کہ وہ اسلام، پیغمبرِ اسلام صلّی اللہ علیہ وسلّم ، کتابِ اسلام،اور اُمّتِ اسلام، سے کسقدر دِلوں میں نفرت رکھتے ہیں، اگر انکے بس میں ہو تو وہ اِن سبکا نام و نشان دنیا سے مِٹادیں۔ مگر مِٹا نہیں سکتے ۔۔ اسلیئے کہ یہ وہ چراغ ہیں جِسے جلائے رکھنے کی ضمانت اللہ نے لی ہے۔۔ اور اللہ جلائے رکھےگا۔۔

"اےوہ لوگو جنکو کتاب دی گئی ہے، ایمان لے آوَ اس کتاب پر،جو ہم نے نازل کی ہے،اور یہ کتاب تصدیق کرتی ہے اُن کتابوں کی،جو تمہارے پاس ہیں۔۔۔ قبل اسکے کہ ہم چہروں کو مِٹا ڈالیں۔ اور چہروں کو انکے پیچھے کی جانب اُلٹادیں۔۔"

{اللہ کا یہ عذاب آسکتا ہے اُسکے لیئے جو اللہ کی کتاب کو ٹھکرائےاور اللہ کی کتاب پر ایمان نہ لائے، یہ عذاب کہ اللہ پاک اسکے چہرے کو مِٹاڈالےیا چہرےکواسکےپیچھےکی جانب الٹادے، اللہ یہ کرسکتا ہے۔۔ دو مطلب ہیں اسکے،
ایک مطلب چہرے کو مِٹاڈالنے کا یہ کہ چہرہ بالکل سپاٹ اور صاف ہوجائے،نہ اسمیں آنکھ نہ ہونٹ، بالکل سیدھا،اور اللہ عبرت کے لیئے بعض اوقات ایسا کر بھی دیتا ہے اور یہ بھی کرسکتے ہیں کہ چہرےکوبالکل پیچھے کی جانب الٹادیں، ایک مطلب تو یہ ہوا اور دوسرا مطلب یہ کہ اگر تم ایمان نہ لائے اور ہماری کتاب کی تصدیق نہ کی توہم تمہیں ذلیل کردینگے

"۔۔۔۔ یا اُن پر لعنت کردیں، جیسا کہ ہم نے لعنت کی ہفتے والوں پر۔۔۔"

{کون تھے ہفتے والے؟ جنہیں اللہ پاک نے "یوم السّبت" میں ہفتے کے دن میں عبادت کا حُکم دیا تھا اور وہ ہفتے کےدِن میں عبادت کرتے بھی تھے،لیکن اللہ نے کہا تھا کہ پورا ہفتے کا دن میری عبادت میں گزارو۔اُنہوں نے تاویل کی,
حیلےبازی سےکام لِیا، اورجیساکہ آپ جانتے ہیں،وہ پہلے سے کھودے گئے گڑھے کے اندر مچھلیاں جمع کرلیتے تھے اور اتوار کے دن پکڑتےتھے، کہتے تھے کہ "ہم ہفتےکےدِن شکار نہیں کرتے،اللہ پاک نے شکار کرنے سے منع کِیاہے۔" ۔۔۔۔ لیکن اللہ نے تو کہا تھا کہ "پورا" ہفتےکا دِن، صبح سے شام تک میری عبادت کرنا ہے اور کُچھ نہیں کرنا۔۔ تو اُنہوں نے تاویل کی کہ ہم ہفتےکےدِن شکارتونہیں کرینگے،لیکن گڑھوں کے اندر مچھلیاں ڈال لینگے،شکار کرینگے اتوار کے دن۔۔ انکا امتحان اللہ نے ایسے لیا تھا کہ ہفتے کے دن مچھلیاں زیادہ آتی تھیں، للچاتے تھے کہ کیا کریں؟ عبادت کریں یا شکار کریں؟ تو شیطان نے یہ تیسرا طریقہ انہیں بتادیا کہ عبادت بھی کرلو اور یہ جمع بھی کرلو۔۔۔ یہ انکا امتحان تھا اسمیں ناکام ہوگئے۔
یہ مچھلیاں تو انکا ذریعۃ معاش تھیں،اُنکے گزران کا ذریعہ تھیں، اور میرے بھائیو۔۔ میری بہنو یہ کرکٹ کے مقابلے ،
یہ ہمارا ذریعۃ معاش تو نہیں ہیں۔۔ یہ ہماری گُزران تو نہیں ہیں۔۔ اِن سے ہمارا پیٹ تو نہیں پلتا ہے۔۔ اِن سے ہمارے گھر تو نہیں بنتے۔۔ لیکن کیا آج ہمارا بھی امتحان نہیں ہورہا---؟
کرکٹ کے مقابلے ہوئے اور مسجد سے نمازی کم۔۔ پتہ چلا کہ مَیچ ہورہا ہے۔۔ عَین تراویح کا وقت۔۔ اور نمازی غائب۔۔
رمضان کا مہینہ، بابرکت مہینہ، تلاوت کا مہینہ، قرآن سُننے سُنانے کا مہینہ،
اور امتحان لیا گیا کرکت مَیچ کے ذریعے ۔۔ اور مسلمان پِھسل گیا۔۔ نمازی پِھسل گیا، بِہک گیا۔۔ نماز کو چھوڑکر ، ٹی وی کے سامنے جا کر بیٹھ گیا۔۔
لعنت ہوئی ہے اُن لوگوں پر جنہوں نے ہفتے کے دن کی بے حُرمتی کی تھی، ہم رمضان کے مہینےکی بےحُرمتی کررہےہیں۔ آدھا مہینہ تو ہمارا ، کرکٹ کے مقابلےمیں گُزرگیا۔اور اب آدھا مہینہ سیاستدانوں کی کُشتی اور دھینگا مُشتی دیکھتےہوئےگُزرجائیگا۔۔

(ye bayaan hy, 30 september 2007, bamutaabiq 15 Ramazaan ul Mubaarak, 1428 Hijree.. ka)

یہ تو لڑتے ہی رہے۔۔ ساٹھ سال ہوگئے لڑتے ہوئے، لڑتےہی رہے، کُرسی کے لیئے ، اقتدار کے لیئے، لڑ ہی رہےہیں۔ مُلک کی بقا کی کوئی پرواہ نہیں۔۔ بس اپنی ذات، اپنی شخصیت، اپنی کرسی، اپنا اقتدار،تو اب باقی پندرہ دن ہمارے اسمیں گُزر جائینگے، رات کو خبرنامہ اور صبح اخبار۔۔ اور باقی وقت میں تبصرے۔۔ فضول قِسم کے تبصرے۔۔ حالانکہ ہمارے تبصروں سے کُچھ بھی نہیں ہوتا،اُنکی صحت پرکوئی اثرنہیں پڑتا۔ --تو اللہ فرما تے ہیں
"یا ہم انکے چہروں کو پیچھے کی جانب اُلٹادیں، یا اُن پر لعنت کردیں،جیسا کہ ہم نے لعنت کی ہفتے والوں پر،اور اللہ کا حُکم پورا ہوکر رہتا ہے-"
{اللہ جو فیصلہ کردے،وہ ہوکر رہتا ہے۔۔ }

اب آیت نمبر اڑتالیس۔۔۔
حضرت علی رضی اللہ تعالیٰ عنہ کا قول ہے:
"پورے قرآن میں مجھے سب سے زیادہ محبوب یہ آیت ہے"
اپنے اپنے ذوق کی بات ہے۔۔ ویسے صحابۃ اکرام رضی اللہ عنہم اجمعین کا ذوق تو ایسا تھا کہ ہوسکتا ہے کہ وہ ہر آیت کے بارے میں یہی کہیں۔ کہ مجھے سب سے زیادہ یہی آیت پسند ہے۔۔
حضرت عبداللہ بن مسعود رضی اللہ تعالیٰ عنہ اپنے شاگردوں کو قرآن پڑھاتے اورکہتے۔۔ :
" جن چیزوں پر سورج طلوع ہوتا ہے، اللہ کی قَسَم اُن سب سے زیادہ بہتر ہے یہ آیت"
شاگرد بڑے متوجّہ ہوکر سُنتے۔۔ کہ ایسی کونسی بات ہے اِس آیتِ کریمہ میں۔
حضرت عبداللہ بن مسعود رضی اللہ تعالیٰ عنہ وہ آیت پڑھاتے۔۔ اور پھر اگلی آیت کے بارے میں بھی وہی فرماتے۔۔
"ارے غور سے سُنو یہ آیت جو ہے، یہ ساری کائنات سے بہتر ہے، زمین سے بہتر، آسمان سے بہتر، سورج سے بہتر۔۔چاند سے بہتر، دولت سے بہتر، تخت و تاج سے بہتر، یہ ہر چیز سے بہتر ہے۔۔ "
تو اُنکی نظر میں تو سارا قرآن ہی بہتر تھا۔۔ سارا قرآن ہی محبوب۔۔
اور ہماری نظر میں۔۔
"کُلُو وَاشرَبُو" کی آیت سب سے زیادہ محبوب۔ مطلب: "کھاوَ اور پِیو"
بس۔۔
اور اسکو "جنّتی عمل" کہتے ہیں۔۔
--
تو حضرت علی رضی اللہ تعالیٰ عنہ فرماتےہیں کہ
"پورے قرآن میں مجھے سب سے زیادہ محبوب یہ آیت ہے"
کیوں؟ اسلیئے کہ اس آیت میں اللہ کی مغفرت کا ذکر ہے۔ اللہ کی بخشش کا ذکر ہے
تو آیت نمبر اڑتالیس میں اللہ فرماتے ہیں:
{توجّہ سے پڑھیئےگا}

"بےشک اللہ نہیں بخشےگا کہ اُسکےساتھ شِرک کِیا جائے۔۔۔،"
{شِرک ناقابلِ معافی جُرم ہے۔۔ اللہ اپنی ذات میں بھی یکتا، اللہ اپنی صفات میں بھی یکتا۔۔ صرف اللہ دیتا ہے اور کوئی نہیں دےسکتا۔۔ عزّت صرف اللہ کے ہاتھ میں ہے،
اور کسی کےہاتھ میں نہیں،
شِفا صرف اللہ کے ہاتھ میں ہے،اور کسی کے ہاتھ میں نہیں،
اولاد صرف اللہ دےسکتاہے،کوئی اور نہیں دےسکتا۔
رِزق دینےوالاصرف اللہ ہے،اور کوئی نہیں۔
زندگی اور موت کا نظام صرف اللہ کے ہاتھ میں ہے،کسی اور کے ہاتھ میں نہیں،
نہ نبی کے ہاتھ میں، نہ فرشتے کے ہاتھ میں،
نہ ولی کے ہاتھ میں، نہ قُطب کے ہاتھ میں، نہ ابدال کے ہاتھ میں،
نہ پِیر کےہاتھ میں، نہ سَیّد کےہاتھ میں،نہ شیخ کےہاتھ میں،
کسی کے ہاتھ میں نہیں ہے
--
توحید۔۔
توحید میں کامل رہیئے-شِرک سے نفرت کیجیئے- ایسےنفرت جیسے ہمیں آگ میں کوئی پھینکے،تو آگ میں پھینکنےسےہمیں نفرت ہوگی،اور بھاگیں گے ، بچنا چاہیںگے،اِسی طریقےسےشِرک سے بچنے کی کوشش کریں،
شِرک مت کریں۔۔۔ اللہ کے بندوں سے محبّت تو کریں،لیکن اللہ کے بندوں کی عبادت نہ کریں،
عبادت صرف اللہ کے لیئے ہے۔اور کسی کے لیئے نہیں،
رُکوع صرف اللہ کے لیئے، سجدہ صرف اللہ کے لیئے،نذر نیاز صرف اللہ کے لیئے،
صدقہ خیرات صرف اللہ کے لیئے،قولی،بدنی،مالی عبادت،صرف اللہ کے لیئے،
اور کسی کے لیئے نہیں ہے، گیارہویں شریف بھی صرف اللہ کے لیئے،
اور بارہویں شریف بھی صرف اللہ کے لیئے،ہر صدقہ خیرات اللہ کے لئیے ہے۔۔
تو فرمایا:
"بےشک اللہ نہیں بخشےگا کہ اُسکےساتھ شِرک کِیا جائے،اور اِسکے علاوہ جسے چاہےگا معاف کردےگا۔۔۔۔"

{اس وجہ سے حضرت علی رضی اللہ تعالیٰ عنہ کہہ رہے ہیں کہ مجھے یہ آیتِ کریمہ سب سے زیادہ محبوب ہے۔۔ اللہ کہہ رہا ہے، کہ جسے چاہونگا معاف کردونگا۔۔جسےچاہونگا۔۔
۔اللہ کی مشیعت پر منحصر ہے، مغفرت، معافی---

دیکھیئے اسلامی تاریخ میں دو بڑے فِرقےگُزرےہیں اب تو تقریباً نہ ہونےکےبرابرہیں،لیکن ایک زمانے میں انکا بڑا چرچہ تھا، خوارج اور معتزلہ
اورآپکوحیرت ہوگی کہ تھے دونوں فرقے،بہت زیادہ عبادت کرنےوالے۔۔بہت زیادہ تقویٰ والے۔۔۔ بلکہ ابھی جو انکا موَقّف آپ اِدھر پڑھنے والے ہیں۔ یہ موقّف بھی اُنہوں نے اختیار کیا خوفِ خُدا کی بِنا پر۔ گناہوں سے نفرت کی بِنا پر،اور اللہ کو راضی کرنےکےلیئے،[شیطان بعض اوقات یوں بھی گمراہ کرتا ہے،خوفِ خُدا کےپردےمیں گمراہ کرتا ہے،دینداری کےپردے میں بھی گمراہ کرتا ہے]
تو خوارج کا موَقّف یہ تھا کہ " ہر گناہ شرک ہے۔ اور ہر گناہ کی سزا، ابدی عذاب ہے،اور کسی گناہ کو بھی اللہ معاف نہیں کریگا" ۔۔ یہ اُنکا قول--
اور معتزلہ کہتےتھے کہ "ہر گناہ شرک تو نہیں ہے لیکن کوئی گناہ توبہ کےبغیرمعاف نہیں ہوسکتا"
۔۔اب دیکھا آپ نے۔۔ یہ دونوں قول بظاہر خوفِ خُداپرمبنی ہیں۔۔یعنی گناہ سے بہت زیادہ ڈرتے تھے
اور گناہ سے بچتےتھے،اسلیئے کہ اُنکے خیال میں گناہ جو بھی ہےوہ ناقابلِ معافی ہے۔ لیکن مسلمان کہتے ہیں،
اہلِ سُنّت والجماعت کہتے ہیں:
کہ نہیں،توبہ سے تو شرک بھی معاف ہوسکتا ہے۔ کُفر بھی معاف ہوسکتا ہے، ہرگناہ معاف ہوسکتا ہے، توبہ کے علاوہ اللہ کی مشیعت سے بھی گناہ معاف ہوسکتےہیں، اللہ چاہےتوکسی کو معاف کردے،اللہ کی مشیعت پر ہم قطعاً پابندی نہیں لگاسکتے،کہ اللہ فلاں کو معاف نہیں کرسکتا اور فلاں کو معاف نہیں کرسکتا۔اسی لیئے تو ہمیں حُکم ہے میرے بھائیو ،میری بہنو۔ کسی گناہگار کو نفرت کی نظر سے نہ دیکھو،گناہ سےتونفرت کرو لیکن گناہگار کو نفرت کی نظر سے نہ دیکھو---ممکن ہے،اُسکی کچھ ایسی چُھپی ہوئی، پوشیدہ نیکیاں ہوں جو اللہ کے علم میں ہوں اور ہمارے علم میں نہ ہوں--اور اللہ پاک اُن نیکیوں کی برکت سے اُسکےگناہوں کو معاف کرکے اسکو جنّت کا حقدار بنادیں۔۔۔ تو اللہ کی مشیعت پر ہے، اللہ چاہے تو معاف کرسکتا ہے۔

تو اللہ کی مشیعت۔۔ مغفرت کا ایک وسیلہ ہے۔۔ مغفرت کے مختلف وسائل میں سے ایک وسیلہ،ایک ذریعہ اللہ کی مشیعت ہے- اللہ چاہے تو معاف کردے۔۔ اللہ کہہ دے کہ ہاں یہ جُھوٹا سچّا میرے قرآن کی خدمت میں لگاہواتھا،اگرچہ عمل کوئی اتنے نہیں ہیں۔۔ جاوَ میں نے اسے معاف کردیا۔۔ اللہ کہہ سکتا ہے۔۔ ہم تو اُمیدوار ہیں الحمدللہ۔۔ مایوس نہیں ہیں۔ صاف بات ہے مایوس نہیں ہیں۔۔اُمیدوں پر جی رہے ہیں،اپنی حد تک عمل بھی کرتے ہیں، نِری اُمیدیں نہیں۔۔
لیکن اصل --اُمیدیں ہی ہیں ہمارا سرمایہ،
کہ امید ہے اللہ معاف کردےگا۔ تو مغفرت کے وسائل میں سے ایک وسیلہ "اللہ کی مشیعت" ہے،
دوسرا وسیلہ "دعا" ہے،
تیسرا وسیلہ "نیکیوں کا کرنا" بھی ہے،
یاد رکھیں نیکیوں کے کرنے سے بھی گناہ معاف ہوتے ہیں،اللہ کہتے ہیں
"نیکیاں ، بُرائیوں کو ختم کردیتی ہیں"
کئی بُرائیاں ہیں جو نیکی کی برکت سے معاف ہوجاتی ہیں
اللہ کے نبی صلّی اللہ علیہ وسلّم کا فرمان ہے:
"ایک نماز سے دوسری نماز کے درمیان، ایک جمعہ سے دوسرے جمعے کے درمیان، اور ایک رمضان سے دوسرے رمضان کےدرمیان جو مسلمان سے صغیرہ گناہ سرزد ہوتے ہیں وہ اللہ پاک، نماز کی برکت سے، جمعے کی برکت سے، رمضان کی برکت سے معاف کردیتے ہیں ، بشرطیکہ وہ کبیرہ سے بچنے والا ہو"
تو نیکیاں، گناہوں کو مٹانے اور معاف کروانے کا تیسرا وسیلہ ہیں
اور گناہوں کی معافی کا ، چوتھا وسیلہ اور سب سے اہم وسیلہ،سب سے موَثر وسیلہ "توبہ" ہے-
سچّے دل سے توبہ

اللہ کو توبہ بہت پسند ہے،اور اللہ توبہ کرنےوالوں کوبہت پسندکرتاہے
اللہ کے محبوب بن جاتے ہیں،کونسے گناہگار؟ جو توبہ کرتے ہیں۔۔اور جو پاک صاف رہتے ہیں
سورۃ بقرہ مین اللہ فرماتے ہیں۔۔
"بےشک اللہ محبوب رکھتا ہے توبہ کرنے والوں کو اور پاک صاف رہنے والوں کو"
اللہ نے دونوں کو اکٹھے ذکر کیا۔۔ توّابین اور متطھّرین کو
اسلیئے کہ توبہ بھی پاکی اور صفائی کا ذریعہ ہے،کپڑوں پر گندگی لگ جائے،صاف پانی سے دُھل جاتی ہے،
اور دل پر گندگی لگ جائے،آنکھوں سے بہنےوالےتوبہ کے آنسووَں سے دُھل جاتی ہے۔
دل صاف ہوجاتا ہے، صاف شفّاف۔ چمک اُٹھتا ہے، ایسا چمک اُٹھتا ہے کہ وہ دل اللہ کا محبوب بن جاتا ہے-
توبہ کرنے والا دل، رونے والا دل۔۔۔
اور اللہ نے سورۃ نور میں فرمایا:
"اور اے ایمان والو۔۔ تم سارےکےسارےتوبہ کرلو۔تاکہ تم کامیاب ہوجاوَ"
{خطاب کافروں سے نہیں ہے، مشرکوں سے نہیں ہے، مومنوں سے ہے--کامیابی ملے گی کس سے؟ توبہ کرنے سے}
---
.
.
مولانا صاحب کی یہ بات
اللہ ہمارے دلوں میں اُتاردے اور یہ بات دُور دُور تک پہنچادے:
" ربّ کعبہ کی قَسم، اِسوقت ساری اُمّت کو توبہ کرنے کی ضرورت ہے
ڈاکٹر توبہ کریں، سائنسدان توبہ کریں،
تاجر توبہ کریں، ملازمت پیشہ توبہ کریں،
عُلماء توبہ کریں، حُکمران توبہ کریں،
لیڈر توبہ کریں، ہر طبقےکےلیئےضروری ہےتوبہ کرنا،
انفرادی سطح پر بھی اور اجتماعی سطح پر بھی،
مُلکی سطح پر بھی،اور بین الاقوامی سطح پر بھی،
ربّ کعبہ کی قَسَم، مسلمان اُمّت کی ذلّت، عزّت میں نہیں بدل سکتی،
اور زوال ،کمال میں نہیں بدل سکتا جب تک کہ یہ پُوری اُمّت توبہ نہیں کریگی۔
توبہ کے بغیر ذلت عزت میں نہیں بدلےگی،
بُھول جایئے، ہم اسی طریقے سے پِٹتے رہینگے ، مار کھاتے رہینگے جب تک کہ توبہ نہیں کرینگے۔
.
.
---
اور اللہ فرماتےہیں سورۃ تحریم میں:
"اےایمان والو-- اللہ کی طرف خالص توبہ کرو"

جی ہاں خالص توبہ۔۔ ہماری توبہ کہاں خالص ہوتی ہے؟ کسی اللہ والے نے کہا ہے
"ہمارا جو استغفار ہے۔۔ اِس پر بھی استغفار کی ضرورت ہے"
کہ ہم نے کیسا مکّاری والا استغفار کِیا ہے۔۔ مکّاری والی توبہ کی ہے۔۔ چکّر بازی والی توبہ کی ہے۔۔ ہم نے تو توبہ کو مذاق بنا لِیا ہے ۔۔ جبکہ اللہ کہہ رہا ہے کہ خالص توبہ کرو۔۔
اللہ اکبر۔۔
ہر کوئی توبہ کرے۔۔ پندرہ سال کی عمر سے چالیس سال کی عمر تک ۔۔ جب سے بالغ ہوئے آج تک، چالیس، پچّاس، ساٹھ سال کی عمر تک، اللہ کے حکم توڑتے رہے، گناہ کرتے رہے۔۔۔ ظلم کرتے رہے۔۔ اللہ کہتا ہے اب تو توبہ کرلے۔۔
اور پیارےنبی صلّی اللہ علیہ وسلّم نےفرمایا:
"اے لوگو--- اللہ کی طرف توبہ کرو اور استغفار کرو۔۔۔ میں ایک دن میں سَو بار توبہ کرتا ہوں"
غور کیجیئے یہ کسکا قول ہے۔۔
نبیوں کا سردار، معصوموں کا سردار،
ولیوں کا سردار۔۔ صلحاء کا سردار،
مجاہدین کا سردار، پاکوں کا سردار۔۔
وہ تو توبہ کرے دن میں سَو بار،
اور ہم؟
جو سر کے بالوں سےلےکر پیروں کےناخن تک گناہوں میں ڈوبے ہوئے۔۔۔
نظریں گندی، کان گندے، زبانیں گندی، دماغ گندے، دل گندے،
جِسم پُورا گناہوں کی گندگی سے آلودہ۔ اور ہمیں ساٹھ سال میں ایک بار بھی توبہ کی توفیق نصیب نہیں ہوتی۔۔ توبہ ہی نہیں کرتے۔۔
اور یہاں یہ واضح کرنا ضروری ہے کہ توبہ کی قبولیت کی شرطوں میں سے ایک شرط یہ ہے کہ

"انسان گناہوں سے رُک جائے"
دوسری شرط یہ ہے کہ "گناہ پر نادم اور شرمندہ ہو"
اور تیسری شرط یہ ہے کہ " آئندہ نہ کرنے کا عزم کرے"
۔۔۔ یہ نہیں کہا جا رہا کہ "آئندہ نہ کرے"

ہوجائے تو ہوجائے
لیکن عزم تو کرے۔۔ کہ آئندہ نہیں کرونگا
ہوگیا۔۔ پھر توبہ کرلے۔۔ لیکن عزم کرے۔۔۔
یا ربّ -- آئندہ نماز نہیں چھوڑونگا
اللہ-- آج تک میں نے زکوٰة نہیں دی، گذشتہ بھی دیتا ہوں،آئندہ بھی زکوٰة دِیا کرونگا
اے اللہ -- مَیں منافقت کرتا رہا، آئندہ نہیں کرونگا
جُھوٹ بولتا رہا ۔۔۔ آئندہ نہیں بولونگا
غیبت کرتا رہا ۔۔۔ آئندہ نہیں کرونگا
بدکاری، شراب نوشی، ظلم ، کرتا رہا، آئندہ نہیں کرونگا
عزم کریں، عزم --- یہ تیسری شرط ہے
اور چوتھی شرط یہ ہے کہ گناہ سے اپنے آپکو بَری بھی کروائے اور اُسکی تلافی بھی کرے۔ اگر کسی کا حق دبایا تھا ، اُسکا حق اسکو واپس کرے

صرف عمرہ کرنے سے، حج کرنے سے اور چِلّہ لگانے سے اور اعتکاف بیٹھنے سے اور توبہ کرنےسے حقوق العباد معاف نہیں ہونگے
لوگ طلم کرتے ہیں ظلم۔۔
کروڑوں کی، لاکھوں کی، زمینوں پر قبضہ جمالیتےہیں
دوسرےکاحق کھاجاتےہیں اورجاتےہیں،عمرہ کرکےآجاتےہیں
سمجھتے ہیں مَیں پاک ہوگیاہوں،جیسے اُس دن تھا جب ماں کےپیٹ سے پیدا ہوا تھا
نہیں۔۔ناپاک ہو تم۔۔ اللہ کہتا ہے، اللہ کے رسول صلّی اللہ علیہ وسلّم کہتے ہیں
تم نے حقوق العباد پر ڈاکہ ڈالا ہے
ایک نہیں، لاکھ عمرےکرلو،لاکھ چِلّےلگالو۔ حقوق العباد نہیں معاف ہونگے
حقوق العباد ادا کرنےپڑینگے

معافی مانگنی پڑےگی: "بھائی یہ میں نے زیادتی کی تھی، معاف کردے"
ہاں معاف کروانےکی کوئی صورت نہ ہو،تو پھر اُسکے لیئے معافی مانگے، اُسکے لیئےاستغفارکرے،ایصالِ ثواب کرےجسکاحق دبایا تھا،جس پر زیادتی کی تھی،تب معاف ہوگا۔
یہ براَت اور تلافی کی شرط کو لوگوں نےبُھلا ہی دِیا۔توبہ کا مطلب سمجھے کہ بس بیٹھ گیا۔۔
" یا اللہ-- معاف کردے،میں نے فلاں کا پلاٹ دبایا تھا، معاف کردے۔۔ اور فلاں کا حق کھایا تھا ، معاف کردے"

نہیں۔۔۔ اللہ کہتا ہے کہ پہلے اُس سےمعاف کرواوَ جسکا حق کھایا تھا۔۔
---
.
.

{مولانا صاحب درس کے آخر میں دست بستہ گذارش کررہےہیں ہم سب سے، کہ "خُدارا سچّے دل سے توبہ کرلیجیئے۔۔ اب تو توبہ کرلیجئیے،
وہ مالک جانتا ہے جو دِلوں کا مالک ہے۔۔
کہ آپکی خدمت میں حاضری کا مقصد،
نہ کسی صِلے کی تمنّا ہے، نہ کسی ستائش کی آرزو ہے۔۔۔ اللہ کا کلام سُنانا ہے، توبہ کی دعوت دینا ہے}
.
.
---
آیت کا آخری حصّہ ہے:
"اور جس نے اللہ کے ساتھ شرک کِیا ، اُس نے بہت بڑا گناہ سمیٹا ہے"

اللہ پاک ہمیں ہر قِسم کے شرک سے بچنے کی توفیق عطا فرمائے آمین
و اٰخِرُ دعوانا عَنِ الحمدللہِ ربّ العٰلمین


.....
http://darsequran.com/sp...peech_htmls/parah05.php
.....

http://darsequran.com/sp...peech_htmls/parah05.php
---
cassette no : 210
سورۃ النساء کی آیت نمبر 49 - 58 ..
---
بیان کا عنوان : امانت
---
آیت نمبر اُننچاس میں اللہ فرماتے ہیں:
ترجمہ:
"کیا آپ نے اُن لوگوں کو نہیں دیکھا،جو اپنے آپکو پاکیزہ ٹھہراتےہیں..."

{کیا آپ نے اُن لوگوں کو نہیں دیکھا جو اپنی تعریفیں کرتے ہیں۔ اپنے آپکو اللہ کا محبوب، اللہ کا پیارا، اور جنّتی کہتے ہیں۔۔ تفسیروں میں لِکھا ہےکہ یہود و نصاریٰ یہ دعوے کرتے تھے،کہ ہم اللہ کے محبوب اور اللہ کے پیارے ہیں،
یہودی کہتے تھے کہ جنّت میں صرف یہودی داخل ہوسکتے ہیں اور کوئی نہیں،
اور عیسائی کہتے تھے کہ جنّت میں صرف عیسائی داخل ہوسکتے ہیں اور کوئی نہیں۔
تو اُن لوگوں کی مذمّت بیان کی۔۔
کہ آپ نے دیکھا ان لوگوں کو جو گھمنڈ اور فخر میں مبتلا ہیں،
جیسےاللہ پاک نے یہود و نصاریٰ کی مذمّت کی ،اسی طریقےسےاُن سارے لوگوں کی مذمّت ہےجو محض نسل کی بِنا پر،
نسب کی بِنا پر،خاندان کی بِنا پر اور قومِیت کی بِنا پراپنے آپکودوسروں سےممتازسمجھتےہیں اورمقدّس سمجھتےہیں۔۔
ہمارےزمانےکےپِیرزادے، سیّدزادے،شاہزادے اور مُلّازادے،بعض اوقات عِلم و عمل کے بغیر محض اپنےآپکواِسلیئےبڑاسمجھتےہیں کہ ہم بڑوں کی اولاد ہیں،اور اُنہوں نے لوگوں کےذہن میں بھی یہ بات بِٹھا رکھی ہے،کہ چونکہ ہم بڑوں کی اولاد ہیں،اسلیئے ہمارے اعمال خواہ کیسےہی کیوں نہ ہوں،جنّت ہماری ہے،نہ صرف یہ کہ ہم جنّت میں جائینگےبلکہ اُنکی باتوں سےتو یہ معلوم ہوتا ہے کہ اللہ پاک نے اُنکو جنّت کا ٹھیکےدار بھی بنا رکھا ہے۔۔وہ جِسے چاہینگےجنّت میں لےجائینگے

جنّتی ہونے کے سرٹیفیکیٹ وہ تقسیم کرتےپھرتےہیں،نذرانوں کےبدلے،اور ہدیوں کےبدلےاور چندوں کےبدلے، -
-تویاد رکھیئےکہ ایمان اور عمل کےبغیرکُچھ نہیں ہے،
کسی سیّد کا بیٹا ہونا،اورکسی شاہ کا بیٹا ہونا،اور پِیر کا بیٹا ہونا،اور مولوی کا بیٹا ہونا تو کیا کام آئیگا۔۔
نبی کا بیٹا ہونا بھی ایمان اور عمل کےبغیر کام نہیں آسکتا۔۔ نوح علیہ السّلام کا بیٹا، اُنکی آنکھوں کےسامنےسیلاب میں غرق ہوگیا۔۔ اور وہ کہتے رہ گئے۔۔ "اے اللہ-- یہ میرا بیٹا ہے" ۔۔۔ اللہ نے فرمایا : "یہ تیرے اَہَل میں سے نہیں ہے،اسلیئے کہ اسکے اعمال اچھے نہیں ہیں" اور فرمایا: "اے نوح {علیہ السّلام}-- جس بات کا تجھے عِلم نہیں ہے اُسکے بارےمیں مجھ سےسوال نہیں کرو۔۔ میں تجھے نصیحت کرتا ہوں ، کہیں تم جاہلوں میں سے نہ ہوجانا"
حضرت نوح علیہ السّلام نے فوراً معافی مانگی :
"اللہ مجھے پتہ نہیں تھا"
اللہ اکبر۔۔۔
اللہ کا نبی کہتا ہے
فوراً اپنے عدمِ عِلم کا اعتراف کرلیا۔۔
" اللہ مجھے پتہ نہیں تھا، اللہ مجھے معاف فرمادے، مجھ پر رحم فرمادے،اگر تُو نے معاف نہ کِیا،اور رحم نہ کِیا تو میں تو تباہ ہوجاوَنگا۔۔"
--
تو بڑے کا بیٹا ہونا کسی کام نہیں آسکتا
میں قربان جاوَں پیارے نبی صلّی اللہ علیہ وسلّم کے قدموں کی خاک پر،
جنہوں نے اپنی اولاد اور اپنے متعلّقین کے ذہنوں سے یہ بات نکال دی تھی کہ

" یہ مت سمجھنا کہ تم میری اولاد ہو لہٰذہ تمہیں عمل کرنےکی ضرورت نہیں ہے"

اپنی لختِ جِگر، خاتونِ جنّت، سیّدہ فاطمہ رضی اللہ تعالیٰ عنہا سےفرمایا:
"اے فاطمہ{رضی اللہ تعالیٰ عنہا}-- آخرت کی تیّاری تمہیں خود کرنی ہوگی۔محمد {صلّی اللہ علیہ وسلّم} کی بیٹی ہونا تمہارے کسی کام نہیں آئیگا"
--
تو اللہ اِس بات کو پسند نہیں کرتےکہ کوئی اپنی تعریف کرے اور اپنے آپکو جنّتی کہے، اس بات کو پسند نہیں کِیا گیا۔۔
دیکھیئے میں اور آپ الحمدلِلہ اُمید تو رکھتےہیں،اللہ کےفضل سے،
اللہ کےکرم سےانشاءاللہ ہمیں جنّت کے کسی کونے کھدرے میں اور اللہ والوں کی جوتیوں میں جگہ مِلجائیگی،
لیکن یقین سے نہیں کہہ سکتے۔ کہ میں تو جنّتی ہوں،
حضرت عُمر بن خطّاب رضی اللہ تعالیٰ عنہ کا قول آپ نے سُنا ہوگا
وہ فرماتے ہیں:
"مجھےاللہ کی رحمت کی امید اتنی ہےکہ اگر قیامت کے دن یہ اعلان سُنوں کہ آج سارے لوگ دوزخ میں جائینگے اور ایک جنّت میں جائیگا تو مَیں امید رکھونگا کہ شاید وہ ایک میں ہی ہوں
اور ڈر اتنا ہے کہ اگر قیامت کے دن اعلان ہوگیا کہ آج سارے جنّت میں جائینگے سوائے ایک کے
تو میں ڈرونگا کہ کہیں وہ ایک، مَیں نہ ہوں"
.
اسی کا نام ایمان ہے
ایمان کیا ہے؟ اُمید اور خوف کےدرمیان۔۔
الحمدللہ ہم امید رکھتے ہیں اللہ کا لاکھ لاکھ شکر ہے،
نا امیدی تو ہمارے قریب ہی نہیں آتی۔۔
میرا اللہ کہتا ہے نا امید نہ ہوجاوَ۔۔اور اللہ کہتا ہے:

ترجمہ:
"اللہ کی رحمت سے نا امید نہ ہوجاوَ،اللہ کی رحمت سے صرف کافر نا امید ہوتا ہے مومن کبھی اللہ کی رحمت سے نا امید نہیں ہوتا"
.
تو نا امیدی کی بات ہم کیوں کریں؟ ہاں ڈر ہے۔۔

ڈر ہے۔۔۔ اسلیئے کہ گناہ بہت ہیں
جو ٹُوٹی پُھوٹی عبادت ہے وہ اس قابل نہیں کہ اللہ کےسامنےپیش کی جاسکے۔۔
بس اللہ اپنے فضل کا معاملہ فرمائے تو انشاءاللہ دوزخ سےنجات مل ہی جائیگی
--
تو منع کِیا گیا کہ اپنی تعریف مت کرو
تمہاری تعریف کا کوئی اعتبار نہیں
خود اپنی تعریف کرنےسے بھی منع کیا گیا اور
دوسرے کی تعریف میں مبالغہ کرنے سے بھی منع کیا گیا ہے

ہمارا دَور لفّاظی کا دَور ہے
مبالغےکا دَور ہے،لوگ ایسے تعریف کرتے ہیں ۔۔ آسمان پر چڑھادیتےہیں،
جِسےچِیخ چِیخ کر بولنا آتا ہو،اُسے کہتے ہیں "علّامہ صاحب" چنانچہ اعلان کرتے ہیں کہ
"شیرِ پنجاب، اور فخرِ زمان، اور غزالئ دوران، علّامہ فلاں صاحب ،خطاب فرمائینگے"
اور وہ بےوقوف یہ سمجھتا ہے کہ واقعی مَیں "علّامہ صاحب" ہوں ۔۔ اسلیئے کہ: "لوگ کہتے ہیں" ۔۔
بلکہ بعض اپنا تعارُف کراتے ہیں،"مَیں تو کُچھ نہیں ہوں، لیکن لوگ کہتے ہیں،کہ علّامہ صاحب ہوں"
[اِسکا مطلب یہ کہ آپ بھی مجھے کہا کریں، علّامہ صاحب]
تو اس سے منع کِیا گیا کہ کسی کی تعریف میں مبالغہ نہ کریں
.
ایک اللہ والےنےفرمایا کہ:
"جب کوئی تمہاری تعریف کرےتوسمجھ لو کہ یہ تمہاری تعریف نہیں کررہا ۔۔ اللہ کی ستّاری کی تعریف کررہاہے،
جس نے تمہارے گناہوں پر اور عَیبوں پر پردہ ڈالا ہوا ہے،
اگر وہ پردہ اُٹھادیتا تو یہ تمہاری تعریف نہ کرتا، تمہارے مُنہ پر تُھوک دیتا"
.
اللہ کے نبی صلّی اللہ علیہ وسلّم نے یہاں تک فرمادیا کہ:
"جو تمہاری تعریف کرتاہےاُسکے منہ پہ مٹّی ڈالو"
.
[اسلیئےکہ لوگ تعریف کرکےدماغ خراب کردیتےہیں،اتنی تعریف کرتے ہیں، اتنی تعریف کرتے ہیں، بانس پر چڑھادیتےہیں]
ایک حدیث میں آتا ہے کہ نبی کریم صلّی اللہ علیہ وسلّم کی خدمت میں ایک صاحب نےکسی کی بڑی تعریف کی۔
نبئ اکرم صلّی اللہ علیہ وسلّم نے فرمایا:
"افسوس ہے تیرے اوپر، تُو نے تو اپنے بھائی کی گردن کو توڑدِیا"
اور فرمایا کہ اگر کسی کی تعریف کرنی ہی ہو تو یوں کہہ دو کہ میرا خیال یہ ہے کہ یہ ایسے ہیں۔۔
باقی یقینی طور پرکہہ دینا اور بہت زیادہ مبالغہ کرنا منع ہے،
اسلیئے کہ ہماری صحیح حقیقت تو اللہ جانتا ہے۔ یہ دنیا والےنہیں جانتے۔۔
ہاں یہ الگ بات ہے کہ ہمیں ہر مسلمان کےبارےمیں اچھا گُمان رکھنا چاہیئے
.
یہ بھی نبی صلّی اللہ علیہ وسلّم کی تعلیم ہے
ہر مسلمان کےبارےمیں اچھا گُمان رکھو،بدگُمانی نہ کرو
یہ سوچو کہ "مجھ سے اچھے ہیں"
.
توفرمایا:
ترجمہ:
""کیا آپ نے اُن لوگوں کو نہیں دیکھا،جو اپنے آپکو پاکیزہ ٹھہراتےہیں...بلکہ اللہ پاکیزہ ٹھہرائیگا،جِسےچاہےگا"
.
{اصل اعتبار تو اللہ کی تعریف کا ہے۔۔ اور اللہ جو تعریف کرتا ہے نا۔۔ بڑے بڑے لقب نہیں دیتا۔۔ بس اللہ تو یوں کہہ دےگا کہ "یہ میرا بندہ تھا" ۔۔ یہ اللہ کی سب سے بڑی تعریف ہے، اللہ کسی کےبارےمیں کہہ دےقیامت کےدِن کہ "اس نے میرا بندہ بن کر زندگی گزاری" ۔۔ ربّ کعبہ کی قَسم ، اس سے بڑی تعریف کوئی نہیں}
انسانوں میں سے تو سب سے زیادہ تعریف کےقابل تو، پیارےنبی صلّی اللہ علیہ وسلّم ہیں،
لیکن اللہ نے حُضور صلّی اللہ علیہ وسلّم کی جوتعریف فرمائی۔۔ وہ کیا؟
کہ "میرے بندے ہیں"
اللہ نے کہا کہ نماز میں کہا کرو:
اَشھَدُ اَن لا اِلٰہَ اِلاَّ اللہ وَ اَشھَدُ اَنَّ مُحَمَّدً عَبدُہ وَرَسُولُہ
سب سے بڑی تعریف حضور صلّی اللہ علیہ وسلّم کی کیا ہے؟ کہ حضور صلّی اللہ علیہ وسلّم اللہ کے بندےہیں

ویسےاللہ نے حضور صلّی اللہ علیہ وسلّم کو خاتمُ النَّبِیّین بھی کہا
رَحمَتُ لّلعٰلَمِین بھی کہا،
یٰس بھی کہا ،
طٰہٰ بھی کہا،
یاایُّھَاالنَّبِیُّ بھی کہا،
یاایُّھَاالرَّسُول بھی کہا،
لیکن عُلماء نے لکھا ہے، کہ حضور صلّی اللہ علیہ وسلّم کی سب سے بڑی تعریف یہ ہے کہ اللہ نے حضور صلّی اللہ علیہ وسلّم کو
عَبدُہ کہا
"میرا بندہ ہے"
.
اور بڑا پیارا شعر ہے اقبال کا،کہتے ہیں:
.
عبد دیگر، عبدہ چیزِ دیگر
ما سراپا انتظار ہوں منتظر
.
مطلب: بندہ ہونا اور چیز ہے، اور اُسکا بندہ ہونا اور چیز ہے
ہم سارےانتظارمیں رہتےہیں،اور جو "عَبدُہ" ہے، اللہ اُسکا انتظارکرتاہے
۔۔
سب سے بڑے "عَبدُہ" تو حضور صلّی اللہ علیہ وسلّم ہیں
لیکن جس نے یہ زندگی اللہ کی مرضی کےمطابق گُزاری،وہ بھی قیامت کے دن "عَبدُہ" کہلائیگا
اللہ کہےگا۔۔یہ میرا بندہ ہے،اور اللہ انتظار کریگا اُسکا کہ اسکی زبان سے کیا نکلتاہے؟
.
خودی کو کر بُلند اِتنا کہ ہر تقدیر سے پہلے
خُدا بندےسےخود پُوچھے، بتا ۔۔ تیری رضا کیا ہے
۔۔
جب "عَبدُہ" کےمقام پر فائز ہوجاتاہےتوپھر اللہ پوچھتے ہیں کہ
بتا ۔۔ تیری رضا کیا ہے
۔۔
تم دنیا میں یہ دیکھ کرچلتےتھےکہ میرا اللہ کیا چاہتاہے؟
قیامت کےدِن مَیں یہ دیکھونگاکہ میرا بندہ کیا چاہتا ہے؟
۔۔۔
ترجمہ:
"کیا آپ نے اُن لوگوں کو نہیں دیکھا،جو اپنے آپکو پاکیزہ ٹھہراتےہیں...بلکہ اللہ پاکیزہ ٹھہرائیگا،جِسےچاہےگا
اور ذرّہ بھی طُلم نہیں کِیا جائیگا"
{اللہ کہتا ہے،ظلم نہیں کِیاجائیگا،لیکن تمہاری اپنی تعریفیں کرنےسےمیرےہاں تم بڑےنہیں بن جاوَگے
ہاں جسکی مَیں تعریف کرونگا،وہی بڑا ہوگا

تم اپنی تعریف کرلو-- بڑے نہیں بنوگے
اور کسی اور کی تعریف کرلو-- وہ بڑا نہیں بنےگا
اصل بڑا وہ ہوگا جسکی مَیں تعریف کرونگا}
--
آیت نمبر پچّاس:
ترجمہ:
"دیکھیئے یہ کیسا جھوٹا طوفان باندھتے ہیں اللہ پر۔۔۔"
.
{کہتےہیں،چونکہ مَیں بنی اسرائیل کی نسل سے ہوں، لہٰذہ مَیں جنّتی، مَیں اللہ کا چہیتا،
چونکہ مَیں فلاں بڑےپِیر کا بیٹا ہوں،لہٰذہ مَیں جنّتی،
چونکہ مَیں فلاں بڑے خاندان سےمیرا تعلّق ہے،لہٰذہ مَیں جنّتی،
اللہ کہتا ہے،یہ جھوٹ بولتے ہیں،میرے ہاں نسب نہیں پُوچھاجاتا،
کِس کے بیٹےہو؟ کِس کے پوتے ہو؟ کِس کے نواسےہو؟
--- یہ پُوچھاجاتاہےکہ تم کیا ہو؟ تمہارےپاس کیا ہے؟
قرآن پاک میں ارشاد ہوتا ہے:
ترجمہ:
"باپ دادا کے کام ،اُن کے اعمال آئینگے اور تمہارے کام، تمہارے اعمال آئینگے"
.
باپ دادا کے کام تمہیں فائدہ نہیں دینگے،یہ ذہن سےنکال دو
۔۔۔۔۔
دیکھیئے یہ کیسا جھوٹا طوفان باندھتے ہیں اللہ پر۔۔۔یہ کافی ہے صریح جُرم کے لیئے"
...

آیت نمبر اکیاون:
میں دو لفظ استعمال ہوئے ہیں ، "جِبت" اور "طاغوت"
جبت = بُت
طاغوت= شیطان
اللہ کےسِوا جسکی بھی عبادت کی جائے وہ جِبت ہے
اور ہر وہ چیز جو انسان کو سرکش بنادے وہ طاغوت ہے
دولت سرکش بنادے تو دولت طاغوت ہے
اور کُرسی سرکش بنادے تو کُرسی طاغوت ہے
یہودیوں کے علماء مکّے گئے، قریش والوں نے اُن سے سوال کِیا،
دیکھو.. ہم حاجیوں کی خدمت کرتے ہیں انکو پانی پلاتے ہیں اور کعبہ کی صفائی کرتے ہیں۔
کعبہ کی دربانی کرتے ہیں , تو کون بہتر ہیں ہم دونوں میں سے؟
ہم بہتر ہیں یا یہ مسلمان بہتر ہیں؟

تویہودی [باوجودیکہ،کتاب کا عِلم رکھتے تھے،انہوں] نے کہا، نہیں تم اُن سے بہتر ہو۔۔
--
آیت نمبر باون:
ترجمہ:
"یہی وہ لوگ ہیں جن پر اللہ نے لعنت کی۔۔۔"
{کیوں لعنت کی اللہ نے؟ --
توحید اور نبوّت کو پہچاننےکےباوجود،وہ شِرک کی تعریف کرتے ہیں۔۔
اور مشرکین کی تعریف کرتےہیں۔۔ بُغض کی وجہ سے، حسد کی وجہ سے۔۔۔}
.
"یہی وہ لوگ ہیں جن پر اللہ نے لعنت کی۔۔۔اور جس پر اللہ لعنت کردے، تم اُسکا کسی کو مددگار نہیں پاوَگے"
.
{جس پر اللہ کی لعنت ہوجائے کسی کی مدد اسکےکام نہیں آسکتی،کسی کی سفارش اسکو فائدہ نہیں دےسکتی،بہت سے اعمال ایسے ہیں جنکے بارے میں حضور صلّی اللہ علیہ وسلّم نے فرمایا کہ انکے کرنے والے پر اللہ لعنت کرتا ہے ۔۔ تو ہمیں اُن اعمال سے اپنے آپکو بچاکررکھناہے،اسلیئے کہ اللہ کہتا ہے کہ جس پر میں لعنت کردوں تو اسکا کوئی مددگار نہیں ہوسکتا}
---
آیت نمبر تریپن:
{اللہ کہتے ہیں ۔۔ یہ یہودی،اتنے تنگ دِل ہیں کہ دینی عظمت تو الگ رہی،اگر اللہ پاک اِنکو دنیا کی عزّت بھی عطا کرتے تو یہ کسی کو دنیا میں سے ایک تِل کے برابر بھی نہیں دینگے}
---
آیت نمبر چَوَّن:
{یہودیوں کو حسد یہ تھا کہ نبئ آخِرُالزّماں صلّی اللہ علیہ وسلّم ، بنو اسرائیل میں کیوں نہیں آیا؟
اور بنو اسمٰعیل میں کیوں آگیا؟
تو اللہ کہتے ہیں۔۔ کیا یہ مَیں نے وعدہ کِیا تھا؟
کہ میرا فضل صرف بنو اسرائیل تک محدود رہیگا۔۔
اور مَیں کسی اور کو دنیا میں اپنا فضل عطا نہیں کرونگا۔۔
یا عطا کرنا چاہوں تو تم سے مشورہ کرونگا۔۔ ؟
کہ کسی اور کو اپنا فضل دوں یا کہ نہ دوں؟
میری مرضی ہے۔۔۔ مَیں جِسے چاہوں عزّت و عظمت سے نوازدوں۔۔۔
چاہوں تو بنو اسرائیل میں نبی پیدا کردوں۔۔
اور چاہوں تو بنو اسمٰعیل میں نبی پیدا کردوں۔۔
۔
اور اللہ نے کِیا۔۔ زیادہ انبیاء علیہم السّلام تو آئے بنو اسرائیل میں۔۔۔
لیکن انبیاء کے سردار صلّی اللہ علیہ وسلّم، آئے بنو اسمٰعیل میں}
---
آیت نمبر پچپن:
ترجمہ:
"اُن میں سےبعض وہ ہیں جو آپ پر ایمان رکھتے ہیں،اور بعض ایسے ہیں جو آپ سے اعراض کرتے ہیں۔۔ [دُور بھاگتے ہیں] اور دہکتا ہوا جہنّم ہی اِنکے لیئے کافی ہے"
---
آیت نمبر چھپّن:
{دنیا کی آگ تو ایسی ہے کہ اگر کسی کو دنیا کی آگ میں ڈال دِیا جائے، جلے گا۔۔ گھنٹہ جلےگا۔۔ آدھا گھنٹہ جلےگا۔۔ پانچ منٹ جلےگا۔۔۔ جل کر راکھ ہوجائےگا۔۔ جِلد ایسی ہوجائیگی کوئلہ، کہ پھر آگ اُس پر کوئی اثر نہیں کریگی۔۔ اور تکلیف کا احساس نہیں ہوگا۔۔ تو اللہ فرماتے ہیں کہ یہ مت سمجھنا کہ دوزخ میں بھی ایسا ہی ہوگا۔۔ کہ تمہیں دوزخ میں ڈالا ، ہڈّیاں جل گئیں اور جِلد کوئلہ ہوگئی۔۔تو اب دوزخ کی آگ تمہیں کوئی تکلیف نہیں دےگی۔۔
یہ مت سمجھنا۔۔ ہم بار بار جِلد کو بدلتےرہینگے۔۔۔ تمہارے چمڑے کو بدلتے رہینگے تاکہ تم عذاب کو خوب چکّھو۔۔}
.
اَللّٰہمَّ اَجِرنا مِنَ النَّار
اَللّٰہمَّ اِنّی اَعُوذُبِکَ مِن عَذابِ جَہَنَّم ، وَ مِن عَذَابِ القَبر
۔۔۔
میرے بھائیو۔۔ میری بہنو ۔۔ میرے عزیزو۔۔۔
دوزخ کا معاملہ بڑا سخت ہے ۔۔۔
میں اور آپ دوزخ کی آگ کا ہزارواں حصّہ بھی برداشت کرنےکی طاقت نہیں رکھتےہیں۔۔
اور آج اللہ نے ہمیں موقع دِیا ہے، کہ ہم اپنےاوپر دوزخ کی آگ کو حرام کرلیں۔۔
اللہ کے نبی صلّی اللہ علیہ وسلّم بتاتے رہے، لوگوں کو بتاتے رہے،
اور علماء نے بتایا۔۔
لوگو ۔۔ ہم بتارہےہیں۔۔
ایسا طریقہ ہے کہ تم دوزخ کی آگ سےبچ سکتےہو۔۔
اور دوزخ کی آگ کو اپنے اوپر حرام کرسکتے ہو۔۔
اب بھی موقع ہے۔۔
آپ تیس سال کے ہیں۔۔ چالیس سال کے ہیں۔۔ پچاس سال کے ہیں۔۔ ستّر سال کے ہیں۔۔
زندگی گناہوں میں گزری ہے۔۔۔ اب باز آجاوَ۔۔
توبہ کرلو۔۔ ندامت کے آنسوں بہا دو۔۔
آئندہ کے لیئے گناہ نہ کرنے کا عزم کرلو۔۔
جوہوچکا ، اُسکی تلافی کی صورت کرلو،
اللہ دوزخ کی آگ کو حرام کردینگے، وگرنہ،ہمارے بس میں نہیں ہے،
ہم برداشت نہیں کرسکتےدوزخ کی آگ کو،
.
اللہ فرماتے ہیں کہ جب اُنکی جِلدیں، اُنکے چمڑے پک جائینگے، توہم اُنکےچمڑوں کو بدل کر دوسرا چمڑا دےدینگے۔ نیا چمڑا۔۔
وہ جلےگا، تیسرا۔۔ بار بار چمڑے بدلتےرہینگے،تاکہ وہ عذاب کوچکھتےرہیں۔
.
ترجمہ:
"بےشک اللہ غالب ہے حکمت والا ہے، [اسکے لیئے ایسا کرنا کچھ بھی مشکل نہیں ہے]"
---
آیت نمبر ستاون:
{یہ میرے اللہ کا کلام ہے۔ اللہ ایسا نہیں کرتا،کہ دوزخ کی سزائیں بیان کرتا جائے،
اگر ایسا کرتا تو بندے مایوس ہوجاتے،
تو اللہ پاک دوزخ کا ذکر کرتے ہیں تو ساتھ ہی جنّت کا بھی ذکر کردیتے ہیں،
اللہ کافروں کا ذکر کرتے ہیں تو ایمان والوں کا بھی ذکر کردیتےہیں،
اپنی پکڑ کا ذکر کرتے ہیں تو اپنی مغفرت اور بخشش کا بھی ذکر کردیتے ہیں
اس آیت میں جنّت کے گھنے سائے کا ذکر ہے
سُبحان اللہ۔۔ کیسے سائے ہونگے کیسی جنّت ہوگی۔۔ کیسی نعمتیں ہونگی۔۔
آج ہم دنیا میں جنّت کی نعمتوں کی پوری حقیقت نہ بیان کرسکتے ہیں نہ سمجھ سکتےہیں۔
اللہ نے خود کہا قرآن میں:
ترجمہ:
"مَیں نے تمہارے لیئے جنّت کی جو ٹھنڈک چُھپا رکھی ہے ،کوئی بھی آج دنیا میں رہتے ہوئے اُسے جان نہیں سکتا"
.
اور ہمارے پیارے نبی صلّی اللہ علیہ وسلّم نے فرمایا:
"وہاں ایسی نعمتیں ہیں جنکو نہ کسی آنکھ نےدیکھااور نہ کسی دِل پر اُنکا خیال گُزرا۔"
--
یہ باتیں تو اللہ ہمیں سمجھانے کے لیئے کرتے ہیں۔۔
باغ ہونگے، نہریں ہونگی، اور دودھ ہوگا اور شہد ہوگا، اور پھل ہونگے۔۔
۔ کیسے ہونگے؟ کیا حقیقت ہوگی۔۔؟ یہ ہم سمجھ نہیں سکتے،
یہ تو ہمارے فہم کے قریب کرنےکےلیئے،ہماری عقل کے قریب کرنےکےلیئے،
تاکہ ہم بات کو سمجھ سکیں،
ہم تو اندھے ہیں۔۔ آخرت کےبارےمیں اندھے ہیں،
ہم نے دیکھا نہیں ہے،
ہاں --- ہمارے پیارے نبی صلّی اللہ علیہ وسلّم نےدیکھا
ہم نے نہیں دیکھا۔۔ ہم تو ایمان رکھتے ہیں۔۔
دیکھا نہیں ہے۔۔ اندھے ہیں۔۔
تو اللہ ہماری سمجھ سے قریب کرنےکےلیئےبات کو بیان کرتے ہیں۔۔
---
آج کے درس کی آخری آیت۔۔
آیت نمبر اٹھاون:
ترجمہ :
"بےشک اللہ تمہیں حُکم دیتا ہے کہ امانتیں، امانت والوں کےحوالےکردو۔۔۔۔۔"
.
تفسیروں میں اس آیتِ کریمہ کا ایک شانِ نُزول لِکھا ہے:
اصل میں آپ جانتے ہیں کہ زمانۃ جاہلیت میں بھی کعبے کی خِدمت کو بڑا اعزاز سمجھا جاتا تھا۔۔
مشرک بھی، ابو جہل بھی، ابو لہب بھی،
یہ کعبےکی خدمت کو اپنے لیئے بہت بڑی عزّت سمجھتے تھے،کہ
"مَیں کعبےکی خدمت کرنےوالاہوں"
"مَیں نے حاجِیوں کوپانی پِلایا"
اور "مَیں کعبے کا چوکیدار ہوں" اور "مَیں کعبےکی صفائی کرتاہوں"
مشرک بھی یہ سمجھتے تھے اور آج ہم مسلمان ہوکر مسجد کی خدمت کرنےکواپنےلیئےعیب سمجھتےہیں۔۔
"خادِم کرےصفائی۔۔مَیں کیوں کروں؟"
]جبکہ ،اللہ کے گھر کی صفائی کرنا، اللہ کےگھر میں جھاڑو دینا،
یہ ذلّت کی بات نہیں ہے، عزّت کی بات ہے۔۔ نصیبےکی بات ہے،
خادِم تو تنخواہ لے کر کرتا ہے، ہم کرینگے اللہ کی رضا کے لیئے،
اللہ کے گھر میں جھاڑو دینگے،اللہ کے گھر کی صفائی کرینگے۔
جو حقیقتاً اللہ کی رضا کے لیئے ، اللہ کے گھر کا خادِم بن جائے،تو اِس سے بڑا مقام کوئی نہیں ہے،
جسے بادشاہوں کےبادشاہ کے دربار میں صفائی کا موقع ملے، کیوں نہ اپنی قسمت پر ناز کرے۔۔
بعض ایسے حضرات کے واقعات پڑھنے میں آتے ہیں جنہیں ، کعبہ یا روضۃ اقدس میں داخل ہونے کاموقع مِلا
تو اُنہوں نے اپنی ڈاڑھی سے، اپنے چہرے سے وہاں کی صفائی کرنی شروع کردی
کہ پتہ نہیں یہ موقع پھر دوبارہ ملے گا یا نہیں ملےگا؟[
.
تو زمانۃ جاہلیت میں بھی کعبےکی خدمت کو باعثِ عزّت سمجھاجاتاتھا

اور انہوں نے آپس میں مختلف خدمتیں تقسیم کر رکھی تھیں،
عثمان بن طلحہ تھے ایک صاحب،اُنکے ذمّے یہ تھا کہ وہ کعبے کا دروازہ کھولتےتھے،
کلید بردار تھے،کعبےکی چابی اُنکےپاس تھی،
تومختلف اوقات میں لوگوں کے لیئے کعبے کا دروازہ کھولا کرتے تھے،
اور کہتے ہیں کہ عام طور پر پِیر اور جمعرات کو کعبے کا دروازہ کھولاجاتاتھا،
۔۔۔ ہجرت سے پہلےایک دفعہ نبئ کریم صلّی اللہ علیہ وسلّم نے کعبےمیں داخل ہونا چاہا،
تو عثمان بن طلحہ نے بڑے سخت الفاظ کہہ کر آپ صلّی اللہ علیہ وسلّم کو اندر داخل ہونے نہیں دِیا۔
عثمان کو پتہ ہی نہیں تھا کہ مَیں اپنے آقا کو محروم کررہا ہوں

پتہ ہی نہیں تھا کہ مَیں کعبےکےمحافظ کو محروم کررہاہوں،
حضور صلّی اللہ علیہ وسلّم نے فرمایا۔۔ کہ عثمان ایک دن آئیگا کہ کعبے کی کنجی،
کعبے کی چابی میرے ہاتھ میں ہوگی،پھر مَیں جسےچاہونگا،دونگا۔۔
[ حضور صلّی اللہ علیہ وسلّم نے پیشنگوئی فرمائی]،
بےبسی کا دَور ہے،بےچارگی کا دَور ہے،گُمنامی کا دَور ہے،
کوئی جانتا ہی نہیں ہے، کوئی مانتا ہی نہیں ہے،
اور آپ صلّی اللہ علیہ وسلّم فرما رہے ہیں کہ عثمان ایک دن آئیگا،یہ چابی میرے ہاتھ میں ہوگی،
پھر جسے چاہونگا،دونگا
۔۔عثمان نے کہا، اگر ایسا وقت آیا تو وہ وقت قریش کی ہلاکت اور ذلّت کا وقت ہوگا،
حضور صلّی اللہ علیہ وسلّم نے فرمایا، نہیں عثمان وہ وقت قریش کی آبادی اور عزّت کا وقت ہوگا۔
اُس دن قریش کو عزت ملےگی اور قریش آباد ہونگے۔۔
پھرایسا ہوا۔۔
حضور صلّی اللہ علیہ وسلّم ہجرت فرما کر مدینہ تشریف لے گئے ،
پھر مکہ فتح ہوا، مکّہ آئے واپس اور عثمان سے چابی لی
اور حضور صلّی اللہ علیہ وسلّم کعبے میں داخل ہوئے،
نماز ادا کی، کعبےسےباہرنکلے ۔۔۔ تو کئی اُمیدوار ہیں۔۔
حضرت علی رضی اللہ عنہ اُمید رکھتے ہیں
اور دوسرے صحابہ رضی اللہ عنہم اجمعین اُمید رکھتےہیں۔
کہ چابی مجھے دےدی جائے، مَیں کعبے کا دربان بن جاوَں،
لیکن حضور صلّی اللہ علیہ وسلّم نے پوچھا،
"عثمان بن طلحہ کہاں ہیں؟"
حاضر ہوئے۔۔ حضور صلّی اللہ علیہ وسلّم نے فرمایا۔۔ عثمان لو چابی، اسلیئے کہ میرے اللہ نے کہا،
"امانت ، امانت والوں کے حوالے کردو"

آپ صلّی اللہ علیہ وسلّم رکھ سکتےتھے چابی۔۔
آپ صلّی اللہ علیہ وسلّم فاتح تھے مکّہ کے،
بڑے بڑے سردار سر جُھکائے کھڑے تھے
لیکن حضور صلّی اللہ علیہ وسلّم نے فرمایا
"نہیں ہم خیانت کرنے والے نہیں ہیں۔۔ ہم امانت کا خیال کرنے والے ہیں۔۔ "
میرا اللہ کہتا ہے:
"بےشک اللہ تمہیں حُکم دیتا ہے کہ امانتیں، امانت والوں کےحوالےکردو۔۔۔۔۔"
۔۔
عثمان نے چابی لی اور ساتھ ہی کلمہ پڑھا۔۔
لا الہ الّا اللہ ، محمّد الرّسولُ اللہ
۔۔۔
یہ تو ہے اس آیتِ کریمہ کا شانِ نزول
لیکن یاد رکھیں ، کوئی آیت بھی اپنےشانِ نزول کےساتھ خاص نہیں ہے،
بلکہ اُسکا مفہوم عام ہوتا ہے،اسی لیئے اللہ نے یہاں ، "امانت" نہیں کہا "امانات" کہا۔۔
جمع کا صیغہ ہے، امانات۔۔
"بےشک اللہ تمہیں حُکم دیتا ہے کہ امانتیں، امانت والوں کےحوالےکردو۔۔۔۔۔"
{امانت میں خیانت نہ کرو۔۔
"معارف القرآن" اُٹھا کر دیکھ لیجیئے ، "مفتئ اعظم پاکستان" ، حضرت مفتی محمّد شفیع صاحب ، نَوَّرَ اللہ مرقدہ نے
اس آیت کے مفہوم کو بڑا وسیع کِیا ہے کہ ساری امانتوں کا لحاظ کرنا ضروری ہےاور امانت میں بہت ساری چیزیں آتی ہیں،

یہ ہمارا جسم، یہ اللہ کی امانت ہے ، یہ ہمارا نہیں ہے
یہ آنکھیں ، اللہ کی امانت ہیں
یہ کان، اللہ کی امانت ہیں
یہ زبان ، اللہ کی امانت ہے
۔۔ ہم میں سےجو آنکھوں کو بد نظری کے لیئے استعمال کر رہے ہیں، امانت میں خیانت کررہےہیں
ہم جو روزمرّہ کے معمولات میں، روانی سے جھوٹ بولتے ہیں، غیبت کرتے ہیں ہم جان لیں کہ ہم اللہ کی امانت میں خیانت کررہےہیں
وہ ہاتھ جو ظلم کےلیئےاستعمال ہورہےہیں ، ان ہاتھوں میں خیانت ہورہی ہے۔۔
اب دیکھیئے، اس جسم کو اگر اللہ کی مرضی کے مطابق ٹکڑے ٹکڑے کروادے تو شہادت کا مقام ملتا ہے
اور اگر اس امانت میں خیانت کرتے ہوئے خود کُشی کرلے ، تو جہنّم کا ایندھن بنتا ہے۔۔
خودکشی حرام ہے۔۔ اللہ کی امانت اللہ کی مرضی کے مطابق استعمال کرلے تو شہادت کا مقام،
اور اپنی مرضی کے مطابق استعمال کرے۔۔
[گلےپرچُھری پھیرلی،زہر کھا لِیا، اپنے آپکو بلندی سے گِرا لِیا،]
امانت میں خیانت کی ہے اور جو جس طریقےسےخودکشی کرےگا،
اسے قیامت کے دن بار بار اُسی طریقےسے عذاب دِیا جائیگا،
ہر مسلمان جانتا ہے کہ خود کشی حرام ہے،
اور جانتا ہے کہ اللہ کی رحمت سے مایوس نہیں ہونا چاہیئے،
آپ دیکھیں اسی لیئے ، پوری دنیا میں خود کشی کا تناسب مسلمانوں میں سب سے کم ہے۔۔ غربت کے باوجود۔۔۔
کئی ایسے غریب ہیں ہم جانتے ہیں ، جنکے پاس سر چُھپانےکےلیئےجھونپڑا تک نہیں ہے،

دو وقت کی ڈھنگ کی روٹی نہیں پکتی۔۔ کِتنوں کے ہاں سالن ہی نہیں پکتا۔۔
بُھوک ہے لیکن خودکشی نہیں،
بیماری ہے۔۔ خودکشی نہیں،
بےروزگاری ہے۔۔ خودکشی نہیں،
-- ہے ۔۔ مگر اُتنی نہیں جتنی مغرب کے خوشحال مُلکوں میں ہے۔۔
معلومات کےبطابق سب سے خوشحال مُلک سُویڈن ہے، جہاں ہر شہری کو ہر سہولت حاصل ہے
علاج مفت، تعلیم مفت، سہولتیں ساری،
لیکن دنیا میں سب سے زیادہ خودکشی سُویڈن میں ہوتی ہے۔
اللہ اکبر--
معلوم ہوا اِس خودکشی کا تعلّق غریبی اور خوشحالی سے نہیں ہے۔۔۔
ایمان اور کُفر سےہے،
جسکےاندر ایمان ہو وہ کبھی خودکشی نہیں کرتا،خاص طور پر تو اللہ کا ذِکر کرنےوالا ہو،کبھی خودکشی نہیں کرتا،پریشانیوں کےبادل برستے ہیں، مصیبتوں کی آندھیاں چلتی ہیں،حوادث کے طُوفان آتے ہیں، گِھر جاتا ہے ہر طرف سے مصیبتیں ہی مصیبتیں، لیکن پھر بھی خودکشی نہیں کرتا،
"یا اللہ تُو رحم فرمادے، اللہ تُو کرم فرمادے"
.
خودکشی وہ کرتا ہے،جو یہ سمجھتا ہے کہ میرا تو اب کوئی نہیں۔
اور مسلمان ہر وقت سمجھتا ہے کہ میرا اللہ تو ہے۔
جب تک یہ احساس اور یقین رہتا ہے،مسلمان خودکشی نہیں کرتا،
---

تو یہ جسم اللہ کی امانت ہے، خدارا دِل میں اُتار لیجیئے۔۔ یہ جسم اللہ کی امانت ہے
آنکھوں سے خیانت نہ کریں۔۔
زبان سے خیانت نہ کریں۔۔
کانوں سے خیانت نہ کریں۔۔
ہاتھوں سے، پَیروں سے خیانت نہ کریں۔۔
یہ اللہ کی امانت ہے۔ جو اِسے اللہ کی نافرمانی کے لیئے استعمال کرتا ہے وہ اللہ کی امانت میں خیانت کرتا ہے۔
مال بھی اللہ کی امانت ہے، مسلمان کی سوچ یہ ہے کہ مال میرا نہیں.. اللہ کا ہے،
اللہ بھی بار بار قرآن میں یہی کہتا ہے:
"ہم نے دِیا"
.
اور یہ جو سوچ ہے کہ مال میرا ہے، میں نے اپنی ذہانت سے، اپنے عِلم سے کمایا،
یہ مومن کی سوچ نہیں ہے، کافر کی سوچ ہے۔
یہ قارون کی سوچ ہے۔۔ سورۃ القصص میں ہے،حضرت موسیٰ علیہ السّلام نے قارون کو سمجھایا:
"تم بھی[اللہ کے بندوں کے ساتھ] احسان کرو جیسا اللہ نے تمہارے ساتھ احسان کِیا ہے"
تو قارون نے کہا:
یہ مال مجھے اللہ نے نہیں دِیا، میرے عِلم اور ذہانت کی وجہ سے مجھے مِلا ہے۔

یہ قارون کی سوچ ہے
جو شخص مال کو اللہ کی مرضی کے مطابق استعمال کرتا ہے،وہ امانت کا حق ادا کرتاہے،
اور جو حرام میں استعمال کرتا ہے، فضول خرچی کرتا ہے،نمود و نمائش کے لیئے استعمال کرتا ہے
وہ اللہ کی امانت میں خیانت کرتا ہے۔۔
چند مسلمان ہیں , واقعی جنکا مال اللہ کی رضا کے لیئے استعمال ہورہا ہے۔
وگرنہ اکثریت وہ ہے۔۔ پچانوے فیصد ، ننانوے فیصد مسلمان وہ ہیں
جنکا مال اللہ کی رضا کے خلاف استعمال ہورہاہے، نمود و نمائش، دکھاوا، اسراف ، فضول خرچی
حرام کے کام، گناہ کے کام--
--
اور ہاں، یہ اولاد بھی اللہ کی امانت ہے،اللہ جسے چاہتا ہے،دیتا ہے،جسے چاہتا ہے،نہیں دیتا۔۔
حضرت اُمّ سُلَیم رضی اللہ تعالیٰ عنہا کا بیٹا فوت ہوگیا۔۔
شوہر سفر سے واپس آئے، وہ چاہتی تھیں کہ سفر کی تھکن ہے انکو جلدی پریشان نہ کروں،شوہر کی تکلیف اور تھکاوٹ کا احساس کرتے ہوئے،ظاہر ہی نہیں کِیا کہ بیٹا فوت ہوگیا ہے،صبح ہوئی،توشوہرسےکہنےلگیں کہ اگر کسی شخص نے ہمارےپاس امانت رکھوائی ہوئی ہو اور وہ امانت واپس مانگے،تو ہمیں واپس کردینی چاہیئے یا منع کردینا چاہیئے؟
{یہ تمہید باندھی} ۔۔
انہوں نے کہا، منع کیوں کرنا ہے؟ ہم کوئی خیانت کرنےوالےتھوڑےہی ہیں۔۔
جسکی امانت ہے اسکو واپس کردینگے جب وہ مانگےگا،

توکہنےلگیں کہ دیکھو وہ بیٹا اللہ کی امانت تھا، اللہ نےاپنی امانت واپس مانگ لی،
وہ تو انتقال کرچکا، اللہ اپنی امانت واپس لےچُکا،مَیں نے بتایا اسلیئے نہیں تاکہ تم پریشان نہ ہوجاوَ،
اُنہیں بڑا غُصّہ بھی آیا کہ پُوری رات ایسے گُزر گئی، میرا بیٹا فوت ہوگیا تم نے مجھے بتایا نہیں؟
گئے نبی کریم صلّی اللہ علیہ وسلّم کی خدمت میں۔۔
حضور صلّی اللہ علیہ وسلّم نے فرمایا،
ابو طلحہ ۔۔ مبارک ہو، اللہ نے تمہیں سمجھدار بیوی عطا کی ہے، مبارک ہو{اللہ اسمیں برکت دےگا} ۔۔
اور اللہ نے ایسی برکت دی کہ ابو طلحہ کے بیٹے، حضرت عبداللہ، -- اللہ نے اُنکو نَو بیٹے دیئے، نَو کے نَو قرآن کے خادم اور حافظ،
۔۔تو اولاد بھی اللہ کی امانت، اس امانت میں بھی خیانت کرنا جائز نہیں ہے۔

جولوگ اپنے بچوں کی غلط تربیت کرتےہیں یا اپنے بچوں کو تباہ ہوتے دیکھتےہیں،مگر روک ٹوک نہیں کرتے،
اولاد اللہ کے حُکموں کو توڑ رہی ہے،مگر روک ٹوک نہیں کرتے،وہ امانت میں خیانت کے مرتکب ہورہےہیں،
اللہ کہتا ہے:
"اےلوگو اپنے آپکو بھی دوزخ کی آگ سے بچاوَ ، اور اپنے اہل و عیال کو بھی دوزخ کی آگ سے بچاوَ "
۔۔۔
کسی کو اللہ پاک عہدہ اور منصب عطا کردے،یہ بھی امانت ہے، اِس امانت میں بھی خیانت جائز نہیں ہے،
عالِم کے پاس عِلم ، امانت ہے
دولت مند کے پاس دولت، امانت ہے
والدین کے پاس اولاد امانت ہے
حکمرانوں کےپاس اقتدار امانت ہے
یہ جوانی امانت ہے، یہ زندگی امانت ہے،
یہ آنکھیں،یہ زبان ، یہ ہاتھ، یہ پاوَں،یہ امانت ہے
یہ دماغی اور ذہنی صلاحیت، یہ امانت ہے
اور اللہ کہتا ہے:
"مَیں قیامت کےدِن پوچھونگا ،
مَیں نے کان دِیئے تھے، کہاں استعمال کِیئے؟
آنکھیں دی تھیں، کہاں استعمال کِیں؟
دِل دماغ دِیا تھا، کہاں استعمال کِیا؟"
---
اور سب سے بڑی امانت دِین کی امانت ہے
اللہ پاک نے ہمکو دِین کی امانت دی ہے، قرآن کی امانت دی ہے، شریعت کی امانت دی ہے،
ہم پر لازم ہے، اس امانت کا حق ادا کریں، خود بھی عمل کریں اور دوسروں کو بھی عمل کی دعوت دیں،
اور ہمارے آقا حضرت محمد صلّی اللہ علیہ وسلّم نے فرمایا:
"جسکےاندر امانت کی صِفت نہیں، اُسکے ایمان کا اعتبار نہیں اور
جِسکےاندر ایفائے عہد کی صفت نہیں،اُسکے دِین کا اعتبار نہیں"
.
آج اس معاشرے میں، سَو میں سے کوئی ایک مِل جائے تو بڑی بات ہے جو امانتدار ہو۔۔ باقی خیانت ہی خیانت--
مال ہمارا خُدا بن گیا
مال کی خاطر خیانت۔۔ دو پیسےکےلیئےایمان بیچ دیتے ہیں۔
.
آئیے عہد کرتے ہیں کہ منافقوں والی جو چار بڑی علامتیں ہیں، آج ہم اُن سے توبہ کر ہی لیں۔۔۔
اللہ پاک ہمارے دل میں یہ خیال ڈالدے آمین۔
عملی منافق کی چار بڑی علامتیں:
اللہ کے نبی صلّی اللہ علیہ وسلّم نے فرمایا
منافق جب بات کرتا ہے جھوٹ بولتا ہے
جب وعدہ کرتا ہے وعدہ خلافی کرتا ہے
اور امانت رکھی جائے تو امانت میں خیانت کرتا ہے
اور ذرا سا جھگڑا ہوجائے تو گالی گلوچ پر اُتر آتا ہے
۔۔
آئیں آج بیٹھے بیٹھے اپنے اپنے دِل میں عزم کرلیں، اپنے اللہ سے وعدہ کرلیں کہ
اے اللہ مَیں اپنی باقی زندگی میں چاروں علامتوں سے بچُونگا
جھوٹ نہیں بولونگا -- انشاءاللہ
امانت میں خیانت نہیں کرونگا -- انشاءاللہ
وعدہ خلافی نہیں کرونگا -- انشاءاللہ
اور گالی گلوچ سےزبان کو گندا نہیں کرونگا

تو اِس آیت نمبر اٹھاون میں فرمایا:
ترجمہ:
"بےشک اللہ تمہیں حُکم دیتا ہے کہ امانتیں، امانت والوں کےحوالےکردو۔۔۔اور جب تُم، لوگوں کے درمیان فیصلہ کرو تو عدل کےساتھ فیصلہ کرو۔۔"
.
مَیں کِیا بتاوَں آپکو کہ اللہ نے اور اللہ کے نبی صلّی اللہ علیہ وسلّم نے عدل کی کتنی اہمیت بیان کی ہے
اللہ حُکم دیتا ہے:
"جب بات کرو تو عدل کی بات کرو"
اور اللہ کہتا ہے:
"عدل کرو، عدل کرنےوالے اللہ کے محبوب ہوتے ہیں"
اور اللہ کے نبی صلّی اللہ علیہ وسلّم فرماتے ہیں:
قیامت کے دِن انسانوں میں سے
سب سے زیادہ اللہ کا محبوب اور اللہ کے قریب "اِمامِ عادل" ہوگا۔۔ عدل کرنے والا اِمام۔۔
اور سب سے زیادہ اللہ سے دُور اور اللہ کی نظر میں قابلِ نفرت "ظالم بادشاہ" ہوگا-
--
ایک طرف میرے رب کی یہ آیات اور پیارے نبی صلّی اللہ علیہ وسلّم کی یہ احادیث۔۔
اور دوسری طرف پُورا عالَمِ اسلام۔۔۔ کم و بیش چھپّن اسلامی ممالک۔۔
ایسا لگتا ہے پُورے عالمِ اسلام پر ظالموں کی حکمرانی ہے۔

ایسے ظالِم کہ امریکیوں کے سامنے تو بھیڑ بنتے ہیں اور اپنے مسلمان شہریوں کے لیئے بھیڑیئے۔
خوفناک قِسم کے بھیڑیئے۔۔ ظالم حکمران مُسلّط ہیں۔
لیکن ساتھ یہ بھی کہہ دوں کہ یہ نتیجہ ہےہمارےاعمال کا
ہم بھی تو ظالم ہیں،ہم میں سے کوئی بھی ظلم سے چُوکتا نہیں ہے،
جہاں اُسکا داوَ چلتا ہے، ظلم سے باز نہیں آتا،
ہم میں سے بھی تو ہر ایک ظالم بنا ہوا ہے،
کوئی اپنے دفتر میں ، کوئی اپنی فیکٹری میں،
کوئی اپنی دکان میں، کوئی اپنے گھر میں، ۔۔۔
اگر ہم عدل کرنے والے بن جائیں تو اللہ پاک ہمیں عادل حکمران عطا فرمادیں،
تو فرمایا کہ:
ترجمہ:
"بےشک اللہ تمہیں حُکم دیتا ہے کہ امانتیں، امانت والوں کےحوالےکردو۔۔۔اور جب تُم، لوگوں کے درمیان فیصلہ کرو تو عدل کےساتھ فیصلہ کرو۔۔ بےشک بہت ہی اچھی بات ہے جسکی نصیحت تمہیں اللہ کرتا ہے، بےشک اللہ پاک سُننے والا ہے، دیکھنے والا ہے"
---
وَاٰخِرُ دعوانا عَنِ الحمدللہِ ربّ العٰلمین

آمین

جزاک اللہ خیر بجّو

آیت نمبر 65

"فَلَا " : ["پس نہیں"]

یہ قرآن کا ایک انداز ہے۔۔ بعض اوقات آپ دیکھینگے, قرآن کہےگا:
"لا" : ["نہیں"]
اور اِس "نہیں" کا اگلے مضمون سے تعلّق نہیں ہوتا"
جیسے۔۔
لَا اُقسِم بِیَومِ القِیَامَہ
وَلَا اُقسِمُ بِالنَّفسِ اللَّوَّامَہ
"لا" کا تعلّق ایسے مضمون کے ساتھ ہے جسکو اللہ نے قرآن میں ذکر نہیں کِیا، ۔۔
.
تو "فلا" کا تعلّق اگلے مضمون کےساتھ نہیں ہے،بلکہ کسی ایسی بات کی تردید ہےجس کا پہلے ذکر ہوچکا۔۔۔۔
اور پہلے جو ذکر ہوا ،آپ پچھلےدرس میں سُن چُکے۔۔ اللہ نےفرمایا:


"کیا آپ نے دیکھا اُن لوگوں کو،جنکا دعویٰ یہ ہے کہ ہم مومن ہیں لیکن فیصلےکرواناچاہتےہیں طاغوت سے۔۔"

[آیت ساٹھ]

---

تویہاں اُس بات کی تردید ہے،
"فلا" : [نہیں۔۔ اِنکے دعوے کا اعتبار نہیں]
"وَرَبّکَ " : [اور تیرے رب کی قَسَم ]
۔۔ کیا انداز ہے۔۔
اسمیں نبئ اکرم صلّی اللہ علیہ وسلّم کی عظمت بھی ظاہر ہورہی ہے۔۔
اللہ کہہ رہا ہے "تیرےرب کی قسم"۔۔ ربّ تو سارے عالمین کا ہے۔۔
الحمدللہ رب العٰلمین
سارے عالمین کا رب ہے، سارے جہانوں کا رب۔۔
لیکن اللہ نے ،عالمین میں سے خاص طور پر ہمارے آقا صلّی اللہ علیہ وسلّم کو منتخب کرکےفرمایا۔۔
کہیں فرمایا: تیری زندگی کی قسم۔
اور کہیں فرمایا، جس شہر میں آپ رہتے ہیں اس شہر کی قسم،
تو یہ حضورصلّی اللہ علیہ وسلّم کے مقام اور رُتبے کو ظاہر کرنے کے لیئے ہے۔
.
تو اللہ فرماتے ہیں
یہ مومن نہیں ہوسکتے، جب تک کہ اپنےتنازعات میں، اپنے اختلافات میں ، اپنے مقدّمات میں، اپنے جھگڑوں میں، آپکےفیصلےکوتسلیم نہ کریں ۔۔
.
اللہ کہتا ہے میرے محبوب، تیرے رب کی قَسَم، اُسوقت تک مَیں اِنکے ایمان کا اعتبار نہیں کرونگا....
.
تین شرطیں لگائیں اللہ نے۔۔مومن ہونےکےلیئے۔۔
ہم میں سے ہر ایک مومن ہونا چاہتا ہے تو وہ ابھی سے ارادہ کرلے کہ مَیں تینوں شرطوں کو پورا کرونگا انشاء اللہ۔
الحمدللہ ہم میں سےہرایک چاہتا ہے کہ مَیں اللہ کے نزدیک مومن بن جاوَں-
یاد رکھیئے۔۔مولوی صاحب کےنزدیک مومن بننے کا اعتبار نہیں ہے،
انسانوں کی نظر میں ہمارے مومن ہونےکا اعتبار نہیں ہے،
اصل تو مومن ہونے کا اعتبار ہے اللہ کی نظر میں،
دنیا والے ہمیں مومن نہ بھی سمجھیں اور اللہ مومن سمجھتا ہے ہمکو ،
تو ہمیں دنیا والوں کے نہ سمجھنےسےکوئی نقصان نہیں ہوگا۔
اور دنیا والے ہمیں بہت بڑا مومن سمجھتے ہیں۔۔اور بڑا متّقی پرہیزگار،
لیکن اللہ کے نزدیک نہ ہم مومن ہیں نہ متّقی، نہ پرہیزگار،
تو دنیا والوں کی تعریفوں سے کچھ نہیں ہوگا،
دنیا والے تو ایسے ہی ہیں ، دھوکہ کھا جاتے ہیں، بےوقوف ہیں،
وہ ہماری ظاہری باتوں سے ایسا سمجھ رہے ہوں کہ یہ بڑا بزرگ ہے۔
لیکن اللہ جانتا ہے۔۔
بزرگ ہے؟
یا کہ نہیں ہے؟
تویادرکھیں یہ تین شرطیں ہیں اللہ کے نزدیک مومن ہونےکےلیئے:ان تینوں شرطوں پر عمل کرنے کی اللہ ہمیں توفیق دے آمین۔
ہے بڑا مشکل کام لیکن اللہ نے کہہ دیا، قسم کھا کر کہہ دیا
تیرے رب کی قسم یہ مومن نہیں ہوسکتے جب تک کہ انکے اندر تین شرطیں نہ پائی جائیں،
پہلی شرط تو یہ ہے کہ زندگی کے سارے معاملات میں آپ صلّی اللہ علیہ وسلّم کے فیصلے کو تسلیم کریں۔۔۔
"زندگی کے سارے معاملات میں" --
ایسا نہیں کہ وضو ٹوٹنے ، نہ ٹوٹنے کے بارے میں تو پوچھتا ہے،
"حضور صلّی اللہ علیہ وسلّم کا کیا حکم ہے؟"
نماز کےبارےمیں تو پوچھتا ہے
پانی کے پاک، ناپاک ہونےکےبارےمیں تو پوچھتا ہے
"حضور صلّی اللہ علیہ وسلّم کا کیا حکم ہے؟"
اور لاکھوں روپے کی کمائی حرام کی کھا رہا ہے اسمیں پوچھتا ہی نہیں
"حضور صلّی اللہ علیہ وسلّم کا کیا حکم ہے؟"
سوچتا ہی نہیں، پوچھتا ہی نہیں، معلوم ہی نہیں کرتا،
معلوم کرنا چاہتا ہی نہیں ہے۔۔
کہتا ہے کہ زیادہ مسئلے معلوم کرتے رہے تو پھر کاروبار کیسے کرینگے؟
لہٰذہ ہم معلوم ہی نہیں کرتے۔۔
.
بہت سارے گناہ ہوگئے تو ایک حج کرکے آجائینگے، عمرہ کرکے آجائینگے اور تحفے تحائف بھی خرید کر لائینگے اور گناہ بھی سارے معاف کرواکے آئینگے۔ یہ لوگ یہ ظاہر کرتے ہیں کہ اللہ صرف سرمایہ داروں کا اللہ ہے، غریبوں کا تو اللہ ہے ہی نہیں۔ وہ تو بےچارے چھوٹے چھوٹے گناہوں پربھی پکڑےجائیں،اور بڑے بڑے مجرم اس طریقےسےاپنےآپکوپاک صاف کرواکے آجائیں
..
۔۔ دوسری شرط: آپ صلّی اللہ علیہ وسلّم جو بھی فیصلہ فرمائیں اس پر اپنے دل میں یہ تنگی محسوس نہ کریں، چاہے وہ فیصلہ اپنی مرضی کے موافق ہو یا اپنی مرضی کے مخالف۔ ۔۔
بظاہر تو فیصلہ مان لے، کہ لوگ کیا کہینگے کہ کیسا مومن ہے۔۔ نبی صلّی اللہ علیہ وسلّم کے فیصلے کو نہیں مانتا۔۔
لیکن دل کُڑھ رہا ہے۔۔ غیظ و غضب ہے دل کے اندر کہ کیسا فیصلہ ہے۔ میرا ستیاناس کردیا۔۔
اور میرے منصوبےکوتباہ کردیا اور میری مرضی کے خلاف ہے۔

فرمایا: اگر دل میں کُڑھن ہے پھر بھی یہ مومن نہیں ہے
مومن کے دل میں اللہ اور اسکے رسول صلّی اللہ علیہ وسلّم کا فیصلہ سننے کے بعد کُڑھن نہیں ہونی چاہیئے،
تنگی نہیں ہونی چاہیئے،گُھٹن نہیں ہونی چاہیئے۔
..
--اور تیسری شرط: اور اُسے پوری طرح تسلیم کرلیں۔۔۔ جیسے تسلیم کرنے کا حق ہے۔
ظاہری اعتبار سے بھی تسلیم کرلیں اور باطنی اعتبار سے بھی تسلیم کرلیں۔
--
اگر ان تین شرطوں کو مان لیا جائے اور اسکے مطابق ہم اپنے گھر کی زندگی بنالیں،
تجارت کی زندگی بنالیں،
عدالت کی زندگی بنالیں،
تو زندگی میں کتنی سہولتیں پیداہونگی--
میاں بیوی میں اختلاف ہو جائے۔۔ وہ کہہ دیں "ہم اللہ اور اسکے رسول صلّی اللہ علیہ وسلّم کے فیصلے کو تسلیم کرلینگے،خواہ وہ کیسا بھی فیصلہ کیوں نہ ہو۔۔ ہماری مرضی کے خلاف ہو یا مرضی کے موافق۔۔ ہم تسلیم کرلینگے "
۔۔ تو جھگڑا ہی نہیں ہے
۔۔
دو تاجروں میں جھگڑا ہوجائے، یا عام افراد میں جھگڑا ہوجائے تو کہہ دیں
کہ ہم اللہ اور اسکے رسول صلّی اللہ علیہ وسلّم کے فیصلے کو تسلیم کرلینگے۔۔ جو بھی ہو۔۔
--
یہ تو اللہ نے قسم کھا کر کہا، اور اُدھر حضور صلّی اللہ علیہ وسلّم نے بھی قسم کھا کر کہا۔۔
" اُس ذات کی قسم جسکے قبضے میں میری جان ہے۔۔ تم میں سے کوئی اُسوقت تک مومن نہیں ہوسکتا جب تک کہ اپنی خواہشات کو وحی کے، اور قرآن کے اور میری شریعت کے تابع نہ کرلے"
---
آپ بتائیے عالَمِ اسلام میں کیا ہورہا ہے؟
کون ہے وحی کےفیصلوں کو ماننے والا؟
قرآن کےفیصلوں کو ماننے والا؟
شریعت کےفیصلوں کو ماننے والا؟
پورے عالَمِ اسلام میں بےدردی سے احکام توڑےجارہےہیں۔۔ اجتماعی زندگی میں خاص طور پر اور انفرادی زندگی میں عام طور پر اللہ اور اسکے صلّی اللہ علیہ وسلّم کے حکموں کو توڑا جارہا ہے-

.....

یہاں ایک وضاحت تو یہ کردوں، کہ یہ جو فرمایا گیا کہ
"میری اتباع کروگے تب نجات ملےگی، اپنی خواہشات کو میرے تابع کرو"
۔۔
تو اِس اِتباع کا تعلّق دینی معاملات کےساتھ ہے،دنیاوی معاملات کےساتھ نہیں ہے،
بعض چیزیں ایسی ہیں ،دنیاوی معاملات سے تعلق رکھتی ہیں،
اُسمیں حضور صلّی اللہ علیہ وسلّم کی اِتباع کرنا ضروری نہیں ہے ۔۔۔
"دنیاوی معاملات" ۔۔ حضورِ اکرم صلّی اللہ علیہ وسلّم کو خاص قِسم کی غذا پسند تھی، اگر بِالفرض کسی کو پسند نہیں ہے یا اُسکے مِزاج کے موافق نہیں ہے، تو ایسا نہیں کہ ہم کہہ دیں کہ تُو تو مومن ہی نہیں ہے۔۔ اسلیئے کہ تجھے وہ چیز پسند نہیں ہے جو حضور صلّی اللہ علیہ وسلّم کو پسند تھی،
ہم اُسکو تسلیم کریں کہ واقعی بہت اچھی چیز ہے، لیکن کیا کروں میری طبیعت ایسی ہے، مزاج ایسا ہے
۔۔۔
اللہ پاک نے مختلف مزاج بنائے ہیں۔
.
"دنیاوی معاملات" ۔۔ یا حضور صلّی اللہ علیہ وسلّم نے چار ، اور چار سے زیادہ شادیاں کیں تو کوئی ہمیں کہے کہ تم بھی مومن نہیں ہوسکتے جب تک کہ ایک سے زیادہ شادیاں نہ کرو
۔۔
تو دنیاوی معاملات میں یہ ضروری نہیں ہے کہ حضور صلّی اللہ علیہ وسلّم کی اتباع کی جائے
اور اسمیں حضور صلّی اللہ علیہ وسلّم نے بھی ہمارے جذبات کا لحاظ کِیا، قُربان جائیے۔۔
حضور صلّی اللہ علیہ وسلّم نے فرمایا۔۔ :
"مَیں انسان ہوں، اگر مَیں دِین میں سے کسی بات کا حُکم دوں تو اُس پر عمل کرو۔۔ لیکن اگر مَیں اپنی رائے سے دنیا کے بارے میں کوئی مشورہ تم کو دوں ،تو یاد رکھو مَیں بھی انسان ہوں۔"
..
تو اصل ہے حضورِ اکرم صلّی اللہ علیہ وسلّم کی اتباع ، اطاعت، آپ صلّی اللہ علیہ وسلّم کی فرمانبرداری،
صحابۃ اکرام رضی اللہ عنہم اجمعین پوری طرح نبئ اکرم صلّی اللہ علیہ وسلّم کے فیصلوں کو تسلیم کرنے والے تھے۔
اُنکےسامنےگردن جھکانے والے--
بےشمار واقعات ہیں، کتابیں بھری پڑی ہیں ان واقعات سے، ایک دو واقعات عرض کردیئے جائیں۔۔
آپ جانتےہیں کہ نبئ اکرم صلّی اللہ علیہ وسلّم نے حُکم دِیا ۔۔ کہ مرنےوالوں کا تین دن سےزیادہ سوگ نہ منایا جائے۔ سوائے شوہر کے-- کہ بیوی اُسکا سوگ تو منائےگی، شوہر کے علاوہ کسی مرنےوالےکا سوگ تین دن سے زیادہ نہ منایا جائے۔ جسکا شوہر فَوت ہوجائے وہ چار مہینے دس دن سوگ منائےگی۔
تو حضرت زینب بنتِ جحش رضی اللہ عنہا کے بھائی کا انتقال ہوگیا، اُس موقع پر تین دن تک تو اُنہوں نے اِظہارِ غم کِیا، لیکن چوتھےدن خوشبو منگواکر اپنے چہرے پر مَل لی،
..
حدیث میں الفاظ خوشبوکےآتےہیں، لیکن مَیں یہ سمجھتا ہوں کہ ہم یُوں کہہ سکتے ہیں کہ
چوتھے دن انہوں نے "کِریم اور پاوَڈر" مَل لِیا اپنے چہرےپر۔
۔ "میک اَپ" کرلیا۔۔
[حدودِ شریعت میں رہتے ہوئے "میک اَپ" کرنا عورت کےلیئے جائز ہے]
اور مَیں "کِریم اور پاوَڈر" کے الفاظ اسلیئے استعمال کررہاہوں کہ
اسلیئے کہ نبئ اکرم صلّی اللہ علیہ وسلّم نےفرمایاکہ،
.
مرد [کے استعمال ] کے لیئے بہترین خوشبو وہ ہے ، جو مہکے تو سہی لیکن اُسکا رنگ نہ ہو [رنگ نہ نظر آئے]
اور عورت [کے استعمال ] کے لیئے بہترین خوشبو وہ ہے ، جسکا رنگ نظر آئے لیکن اسکی خوشبو تیز نہ ہو۔۔ [کہ دُور دُور تک پتہ چل جائے کہ فلاں گُزر رہی ہیں-- ایسا نہ ہو]
---
توبہرحال انہوں نے چوتھے دن خوشبو مَل لی چہرے پہ۔۔ اور فرمایا کہ مجھے اِس خوشبو کی [کِریم اور پاوَڈر کی] قطعاً کوئی ضرورت نہیں ہے، نہ تمنّا،نہ طلب ، کوئی حاجت نہیں، لیکن چونکہ حضور صلّی اللہ علیہ وسلّم نے فرمایا کہ "شوہرکےعلاوہ کسی مرنےوالےکا سوگ تین دن سے زیادہ منانا جائز نہیں" ۔۔ مَیں نے اسلیئے خوشبو کا استعمال کِیا ہے-


اسی طریقے سے حضرت اُمّ حبیبہ رضی اللہ عنہا کےوالد کا انتقال ہوگیا چوتھے دن انہوں نے بھی اپنے چہرے پر خوشبو مَل لی اور یہی الفاظ ارشاد فرمائے کہ چونکہ اللہ کے نبی صلّی اللہ علیہ وسلّم نے تین دن سے زیادہ سوگ منانے کی اجازت نہیں دی اسلیئے مَیں نے ایسا کِیا ہے۔
تو حضورِ اکرم صلّی اللہ علیہ وسلّم کی تعلیمات اور احکام کی پُوری طرح
اتباع کرنےوالے تھے تمام صحابۃ اکرام رضی اللہ عنہم اجمعین
--
حضرت خُرَیم اسعدی رضی اللہ عنہ کے بال تھے لمبے لمبے،
اور چادر اور تہہ بند جو باندھتے تھے وہ ٹخنوں سے نیچے لٹکتا ہُوا۔۔
ویسے بڑے اچھے انسان تھے،
تو حضورِ اکرم صلّی اللہ علیہ وسلّم نے فرمایا کہ
خرَیم اسعدی بہت اچھا انسان ہے،کاش یہ بال اتنے لمبے نہ رکھتا،اور تہہ بند ٹخنوں سےنیچےنہ لٹکاتا۔۔
[حضورِاکرم صلّی اللہ علیہ وسلّم کےسمجھانے کا طریقہ بھی بڑا پیارا۔۔ کہ بہت اچھا آدمی ہے۔۔کاش یہ دو باتیں اسکےاندر نہ ہوتیں]
اُنکو اِطلاع مِلی۔۔ تو اُنہوں نے قینچی لی، بال کاٹ دِیئے اور چادر ٹخنوں سے اوپر باندھ لی۔
۔۔۔ کہ حضورِاکرم صلّی اللہ علیہ وسلّم نےفرمایاہے


تو اسطریقے سے حضورِ اکرم صلّی اللہ علیہ وسلّم کی تعلیمات اور احکام کی پُوری طرح
اتباع کرنےوالے تھے تمام صحابۃ اکرام رضی اللہ عنہم اجمعین
--

اصل بات یہ کہ اُنکے دل میں حضورِ اکرم صلّی اللہ علیہ وسلّم کی محبت بھی تھی
اور حضورِ اکرم صلّی اللہ علیہ وسلّم کی عظمت بھی تھی۔
۔ اور یہ دونوں چیزیں ہوں تو اتباع خود بخود ہو جاتی ہے۔
۔ اتباع کے لیئے پھر تکلّف بھی نہیں کرنا پڑت۔
ایک تو دل کے اندر اللہ کے نبی صلّی اللہ علیہ وسلّم کی عظمت ہو۔
۔ آپ صلّی اللہ علیہ وسلّم کا مقام اور مرتبہ۔
۔ کہ کتنی بڑی ہستی ہیں آپ صلّی اللہ علیہ وسلّم ۔
اور کتنی بڑی ہستی کی طرف نسبت ہے میری۔
۔ تعلّق ہےمیرا۔
۔ اُمّتی ہوں مَیں اُنکا۔
۔ اور پھر آپ صلّی اللہ علیہ وسلّم سے محبت بھی ہو--
یہ دونوں چیزیں ہونگی تو۔
۔ [یہ دونوں چیزیں] اتباع پر مجبور کردینگی۔

---

 

آیت نمبر 74
اللہ فرماتے ہیں کہ:
" [اگر اِسکی یہی تمنّا ہے کہ اِسے بڑی کامیابی مِلے تو ]  اِسکو چاہیئے کہ اللہ کی راہ میں
اُن لوگوں کےساتھ قِتال کرے جو دُنیا کی زندگی کو آخرت کے بدلے میں خریدنے والے ہیں "
--
کون ہیں دنیا کی زندگی کو آخرت کے بدلے میں خریدنے والے؟ ۔۔ کُفّار اور مُشرکین
[ اور بعض نے معنیٰ کِیا کہ ]
"  پھر اللہ کی راہ میں لڑیں، وہ لوگ جو دنیا کی زندگی کو بیچنے والے ہیں آخرت کے بدلے میں "
یہ کون ہیں؟ ۔۔ ایمان والے۔۔ جو دنیا کی زندگی کو بیچ دیتے ہیں آخرت کے بدلے میں
یہ جو لفظ ہے : " شِراء "  کا ،  یہ دونوں معنیٰ میں آتا ہے
بیچنے کے معنیٰ میں بھی  آتا ہے اور خریدنے کے معنیٰ میں بھی آتا ہے
تویہ معنیٰ بھی بن سکتا ہے:
" اُن لوگوں کے ساتھ قِتال کرو، جو دنیا کی زندگی کو خریدنے والے ہیں آخرت کے بدلے میں"
۔۔ اور یہ ہیں کُفّار
اور یہ معنیٰ بھی بنتا ہے:
" اُن لوگوں سے قِتال کرو، جو دنیا کی زندگی کو بیچنے والے ہیں آخرت کے عِوض"
اور یہ ہیں ایمان والے۔
--
آیت کا اگلا حصّہ ہے:
ترجمہ:
"اور جو اللہ کی راہ میں قِتال کرتا ہے ، پھر وہ مارا جاتا ہے ، یا غالِب آجاتا ہے ، تو ہم اُسکو بہت بڑا اجر دینگے"
دونوں حالت میں مسلمان کو اجر مِلتا ہے
وہ شہید ہوجائے تو بھی اجر کا مُستحق
اور اگر غازی بن جائے تو بھی اجر کا مُستحق

-x-

.

.