گھر میں بنائے ہوئے اُبٹن سے چہرہ نکھارئیں اور عید کے دن خوبصورت نظر آئیں.

رمضان المبارک میں گھر سے نکلنے اور بیوٹی پارلر جانے کا وقت نہیں ملتا لیکن اس کا مطلب ہرگز یہ نہیں ہے عید کے دن آپ کا چہرہ بے رونق نظر آئے۔ عید کے دن تروتازہ اور نکھرے ہوئے چہرے کے لیے رمضان کے مہینے میں گھر میں بنایا ہوا اُبٹن استعمال کریں اور عید کے دن خوبصورت نظر آئیں۔

چاول سے تیار کردہ اُبٹن

آدھی پیالی دودھ میں چار چائے کے چمچے چاول بھگوئیں۔ بیس منٹ کے بعد ان چاولوں کو پیس لیں۔ اس آمیزے میں ایک چائے کا چمچ زیتون کا تیل شامل کرکے گردن اور چہرے پر لگائیں۔ اس سے چہرے کی جھریاں دور ہوں گی اور گردن کا سیاہ پن بھی دور ہو جائے گا۔

مسور کی دال کا اُبٹن

آدھی پیالی دودھ میں تین کھانے کے چمچے مسور کی دال اور ایک بادام ڈال کر رات بھر  بھگو دیں۔ صبح انہیں پیس کر چہرے گردن، ہاتھوں اور پاؤں پر لگائیں۔

جو کا اُبٹن

چار چائے کے چمچے جَو کے آٹے میں لَسی ملا کر گاڑھا آمیزہ بنا لیں۔ اسے چہرے، ہاتھوں، پاؤں اور گردن پر باقاعدہ لگانے سے جِلد صاف ستھری اور نکھری محسوس ہوتی ہے۔

شہد اور بادام کا اُبٹن

چہرے کو نرم و ملائم اور خوبصورت بنانے کیلئے رات بھر پانچ بادام دودھ میں بھگو کر رکھیں۔ صبح ان باداموں کے چھلکے اُتار کر پیس لیں۔ باداموں کے سفوف میں ایک چائے کا چمچ شہد اور ایک چائے کا چمچ سُوکھا ہوا دودھ ملاکر ہفتے میں کم از کم دو مرتبہ استعمال کریں۔

دالوں کا اُبٹن

دو کھانے کے چمچ چنے کی دال اور دو کھانے کے چمچ مونگ کی دال کو آدھے گھنٹے تک پانی میں بھگونے کے بعد پیس لیں۔ اس آمیزے میں آدھا چائے کا چمچ ہلدی، بادام کے تیل کے چند قطرے ملا کر ہاتھوں اور چہرے پر لگانے سے نکھار پیدا ہو گا۔

ان کے علاوہ سرسوں، گلاب کی پتیوں، نیم اور صندل وغیرہ کے اُبٹن سے بھی چہرے کی جِلد پر اچھے اثرات ظاہر ہوتے ہیں۔

کسی بھی قسم کا اُبٹن چہرے پر لگانے سے پہلے چہرہ اچھی طرح سے صاف کرلیں، پھر  ملائی یا مکھن سے چہرے کی مالش کریں اور بھاپ لیں تاکہ مسام اچھی طرح کُھل جائیں، اس کے بعد اُبٹن لگائیں۔ اُبٹن لگانے کے بعد بات چیت یا کوئی اور کام نہ کریں۔ اُبٹن لگانے کے ایک گھنٹے بعد تک دھوپ میں نہ جائیں۔ اُبٹن اُتار نے کے بعد چہرے کو ٹھنڈے اور تازہ پانی سے دھوئیں۔ صابن وغیرہ استعمال نہ کریں۔ ہفتے میں کم از کم ایک مرتبہ اُبٹن ضرور استعمال کریں۔