روزوں کے دوران ایچ ڈی ایل کی سطح بڑھ جاتی ہے جسے دل کے لیے مفید خیال کیا جاتا ہے

رمضان المبارک کے دوران غذائی عادات بدل جاتی ہیں۔ روزے کے جسم پر جو مثبت اثرات مرتب ہوتے ہیں ان میں خون کے روغنی مادوں میں ہونے والی تبدیلیاں قابل ذکر ہیں خاص طور پر دل کے لیے مفید چکنائی ایچ ڈی ایل کی سطح میں تبدیلی بڑی اہم ہوتی ہے کیوں کہ اس سے دل اور شریانوں کو تحفظ حاصل ہوتا ہے۔

بڑھے ہوئے کولیسٹرول کے مریض عام طور پر نباتاتی تیل استعمال کرتےہیں اور رمضان المبارک کے دوران نباتی تیل کے استعمال کے فوإئد و اثرات بھی ثابت ہو چکے ہیں، خاص طور پر سورج مکھی کے تیل کے استعمال سے خون میں ایچ ڈی ایل کی سطح میں مفید اضافہ ریکارڈ ہو چکا ہے۔ اسی طرح زیتون کے تیل کے استعمال سے خون میں کولیسٹرول میں کمی بھی ثابت ہو چکی ہے۔ روزوں کے دوران ایچ ڈی ایل کی سطح بڑھ جاتی ہے۔ اور یہ بات آپ کے علم میں ہے کہ ایل ڈی ایل دل کے لیے مضر اور ایچ ڈی ایل دل کے لیے مفید چکنائی ہوتی ہے۔

 اس بات کی مزید توثیق کے لیے پشاور یونیورسٹی کے شعبہ حیاتیاتی کیمیا ﴿بائیو کیمسٹری﴾ میں 10 مردوں اور 10 خواتین کے خون کے نمونوں کا رمضان المبارک کی ابتدا، درمیان اور آخر میں مطالعہ کیا گیا۔ ان افراد کے خون میں رمضان المبارک کے وسط میں ایچ ڈی ایل کو لیسٹرول اور ایل ڈی ایل کولیسٹرول کی سطح میں معمولی اضافہ ریکارڈ کیا گیا۔ ان نمونوں کا مطالعہ بڑا دلچسپ رہا۔ رمضان کے آغاز اور اختتام پر تمام افراد میں سے 65 سے 90 فیصد کے خون میں کولیسٹرول، ٹرائی گلیسرائڈ، ایچ ڈی ایل اور ایل ڈی ایل کولیسٹرول کی سطحیں معمول کے مطابق پائی گئیں، جبکہ ان میں سے 5 سے 20 فیصد میں یہ روغنی مادے خطرے کی سطح کے قریب پائے گئے، تاہم رمضان کے وسط میں ان مادوں کی سطح میں کمی بیشی دیکھی گئی۔ کولیسٹرول اور ٹرائی گلیسرائڈ کی نارمل سطح والوں میں ایچ ڈی ایل اور ایل ڈی ایل میں 10 سے 25 فیصد اضافہ پایا گیا۔ رمضان کی ابتدا اور اختتام پر 25 سے 70 فیصد میں کولیسٹرول ایک ہی سطح پر برقرار رہی لیکن خطرے کی سطح سے قریب والوں کے خون میں کو لیسٹرول کی سطح رمضان کے اختتام کے وقت کم ہو گئی اور ان میں مردوں کے مقابلے میں خواتین کا تناسب زیادہ رہا۔

پورے روزوں میں ٹرائی گلیسرائڈ کی سطح بھی کولیسٹرول کی طرح معمول کی سطح پر رہی، لیکن خواتین کا تناسب اس سلسلے میں بھی مردوں سے زیادہ رہا۔ اسی طرح ایچ ڈی ایل کے معاملے میں بھی خواتین کے خون میں اس کی نارمل سطح کا تناسب مردوں سے زیادہ تھا۔ ان تینوں چکنائیوں کی سطح میں کمی سے یہی ثابت ہوتا ہے کہ رمضان المبارک ہمیں غذائی بے احتیاطیوں پر قابو پانے کا بہترین موقع فراہم کرتا ہے اور اس میں روزوں کی وجہ سے چکنائیوں کے استحالے ﴿میٹا بولزم﴾ کی شرح بھی بہت بہتر ہو جاتی ہے۔

Important Note: The articles presented are provided by third party authors and do not necessarily reflect the views or opinions of KhanaPakana.com. They should not be considered as medical advice or diagnosis. Consult with your physician prior to following any suggestions provided.