قدرتی طریقے سے اپنے ہونٹوں کی حفاظت کریں

نکھرے چہرے کے ساتھ گلابی اور نرم ہونٹ کی خواہش کِسے نہیں ہوتی۔ سچ تو یہ ہے کہ ہونٹوں کا سیاہ پن چہرے کی مجموعی خُوبصورتی کو نقصان پہنچانے کا سبب بنتا ہے۔ ہونٹوں کے سیاہ ہونے کی کئی وجوہات ہیں۔ مُناسب دیکھ بھال نہ ہونے، گھٹیا (cheap) اور سستی لِپ اسٹک کا استعمال، ایلو پیتھک (allopathic) دواؤں کے منفی اثرات، موروثی اور چُھوت کی بیماری، پیٹ کے کیڑے ، دل کی بیماری، آلودگی وغیرہ کی وجہ سے ہونٹ سیاہ ہوکر اپنی کشش کھو بیٹھتے ہیں۔

آئیے ہم آپ کو بتاتے ہیں کہ آپ اپنے ہونٹوں کو کس طرح گلابی کر سکتے ہیں لیکن سب سے پہلے یہ جان لیں کہ ہونٹوں پر لگائی جانے والی مصنوعات ہمیشہ اچھی کمپنی کی خریدیں، سستی اور غیر معیاری مصنوعات ہونٹوں کو خراب کر دیتی ہے۔ رات کو سونے سے قبل ہونٹوں کو صاف کرکے سوئیں۔

·         رات کو سونے سے قبل ویسلین (vaseline) ہونٹوں پر لگا کر سوئیں۔

·         سونے سے پہلے زعفران کے پانی میں بھیگے ہوئے پتے ہونٹوں پر لگائیں اور 10 منٹ کے بعد دھو لیں۔

·         پسی ہوئی پِھٹکری (alum)، گلاب کا عرق اور چار قطرے لیموں کا رس ملا کر ہونٹوں پر لگائیں۔

·         تھوڑی سی بالائی چند قطرے لیموں کا عرق ملا کر ہونٹوں پر لگائیں۔

·         پھٹکری اور گلیسرین ملاکر لگائیں۔

·         سردیوں میں پھٹے ہوئے ہونٹوں کے لئے گائے کا کچا دودھ ہونٹوں پر لگائیں۔

·         ٹماٹر کاٹ کر ہونٹوں پر مَلنے سے ہونٹوں کی سیاہی دور ہو جاتی ہے۔

·         لیموں کے چِھلکے ہونٹوں پر رگڑیں۔

·         گلاب کی پتیوں کو پیس کر دودھ میں مِلائیں اور اچھی طرح سے مَسّل کر ہونٹوں پر لگالیں۔

·     کسی وجہ سے ہونٹ سیاہ پڑ گئے ہوں تو کچے دودھ میں روئی کے ٹکڑے کو بھگو کر ہونٹوں پر نرمی سے دن میں تین سے چار بار لگائیں۔ کچھ دنوں کے باقاعدہ استعمال سے ہونٹ گلابی ہو جاتے ہیں۔

·     کھیرے، سنگترے یا مُوسمبی کی قاش کو ہونٹوں پر مَلنے سے نہ صرف ہونٹوں کی جِلد خوبصورت اور ملائم رہتی ہے بلکہ یہ عمل ہونٹوں کو ٹھنڈک بھی پہنچاتا ہے۔

·     ایک چمچ دودھ کی ملائی میں تین قطرے لِیموں کا رَس مِلا کر نرمی سے ہونٹوں پر لگائیں۔ دودھ کی ملائی بہترین کلنزر (cleanser) ہے، اس کا موئسچرائزر (moisturizer) ہونٹوں کو نرم و ملائم بناتا ہے۔

·         گلاب کی تازہ پتیوں کو پیس کر مکھن میں ملائیں اور اس مرکب کو ہونٹوں پر لگائیں۔ اس سے ہونٹ چِکنے اور تروتازہ رہتے ہیں۔

احتیاط

پُرانی لِپ اسٹک (lipstick) کا استعمال ہونٹوں کو سیاہ کرنے کا باعث بنتا ہے۔ خریدی گئی لِپ اسٹک کو تین یا چار ماہ سے زیادہ استعمال نہ کریں۔ برفیلی اور گرم ہوائیں یا تیز دھوپ بھی ہونٹوں کی سیاہی کا سبب بنتے ہیں۔ برفیلی ہواؤں سے ہونٹوں کو بچانے کے لئے مکھن یا ملائی کا استعمال کریں اور ہونٹوں کو ڈھانپ کر رکھیں۔ تیز دھوپ سے ہونٹوں کو محفوظ رکھنے کے لئے چَھتری کا استعمال کریں تاکہ گرم ہواؤں کا اثر ہونٹوں پر نہ پڑے۔