چاول پکانا

نئے چاول پکانا مشکل ہوتے ہیں۔ اگر چاول بھگوتے ہوئے ان میں اچھی طرح نمک ملا دیں پھر دھو لیں تو وہ پرانے چاولوں کی طرح پکیں گے۔

چاول اُبالنا

کسی بھی قسم کے چاول پکا رہے ہوں تو اُبالتے وقت ایک کھانے کا چمچ سفید سرکہ ڈال دیں چاول بکھرے پکیں گے۔ چاول اُبالتے وقت ایک انگلی کی پور کے برابر چاول کے اُوپر پانی ہونا چاہئے۔

چاول نرم رکھنا

پلاؤ میں اگر زیادہ دم لگ جانے کی وجہ سے چاول سخت ہو جائیں یا کنی رہ جائے تو اس میں دودھ یا پانی کا چھینٹا دیجئے اگر اس میں ذرا سا نمک بھی گھول لیا جائے تو بہتر ہو گا۔

جلے ہوئے چاول کی بو

چاول اگر دم پر جل جائیں اور ذرا سی بُو آنے لگے تو چار ڈبل روٹی کے توس چاولوں کے اوپر پھیلا کر رکھ دیں۔ تھوڑا سا دودھ ڈال دیں پانچ منٹ کے لیے مزید دم پر رکھ دیں جلنے کی بُو ختم ہو جائے گی۔

چاول کا زردہ

زردہ پکانے کے لیے لکڑی کا چمچ استعمال کریں اسٹیل کے چمچے سے چاول اکڑ جاتے ہیں۔